“Qelbësirllëku ushqehet me të pavërtetën”- Aktivistja u arrestua pas denoncimit të saj? Reagon Iris Luarasi: ‘Fake news’ dhe manipulim i shëmtuar, s’ka lidhje me mua

Deputetja e Partisë Socialiste, Iris Luarasi, i është përgjigjur një lajmi të përhapur masivisht, sipas të cilit një aktiviste u shoqërua nga policia pasi kjo e fundit bëri një denoncim ndaj saj.

Sipas Luarasit, ky pretendim është krejtësisht i pavërtetë. Ajo sqaroi se ndërhyrja e policisë lidhej me një çështje krejt tjetër: sulmin ndaj automjetit të deputetes Ilva Gjuzi dhe dëmtimin e pasqyrës së tij.

“Protestuesja është shoqëruar në komisariat lidhur me sulmin ndaj automjetit privat të deputetes Ilva Gjuzi dhe dëmtimin e pasqyrës së tij dhe s’ka lidhje fare me mua”, shkroi Luarasi në reagimin e saj zyrtar.

Ajo theksoi se ende nuk ka ndërmarrë hapa ligjorë ndaj atyre që e kanë sulmuar dje në mënyrë të tillë. Luarasi akuazoi mediat dhe faqet online për manipulim të qëllimtë.

Përdorimi i imazhit të saj mbi trupin e një gruaje tjetër përbën, sipas deputetes, “poshtërim publik dhe dhunë digjitale ndaj një gruaje”. Ajo shtoi se kur kjo shpifje shoqërohet edhe me një lajm të rremë, atëherë flitet për diçka larg standardeve gazetareske.

“Kur kësaj i shtohet edhe një lajm i rremë, nuk kemi më as informim, as satirë dhe as gazetari. Gazetaria kërkon të vërtetën, kurse qelbësirllëku ushqehet me gënjeshtrën. Mos i ngatërroni. Dhe qelbësirllëku nuk quhet gazetari”, përfundoi ajo.