“Pse nuk shfuqizoni ligjin?”- Një grup protestuesish shkon në takimin për Praninë Besnike të ministrit Sofjan Jaupaj, reagimi i tij

Një takim i organizuar në Tiranë në kuadër të nismës “Prania Besnike” të Partisë Socialiste është ndërprerë për pak minuta nga një grup protestuesish. Takimi drejtohej nga ministri Sofjan Jaupaj.

Të rinjtë hynë në sallë dhe iu drejtuan drejtpërdrejt ministrit. Pyetja e tyre ishte e qartë: pse nuk shfuqizohet ligji 21/2024.

Jaupaj u përgjigj se ai nuk ishte vendi dhe as momenti i duhur për këtë diskutim. Ai i ftoi protestuesit të ulen dhe të bisedojnë për shqetësimet që kanë.

Teksa debati vijonte, ministri iu drejtua të rinjve me këto fjalë: “Jam duke i bërë negociata siç duhet për BE, nuk është as vendi as momenti për këtë”, dëgjohet ai në pamjet e publikuara.

Protestuesit nuk pranuan ftesën për t’u ulur. Ata këmbëngulën sërish te kërkesa për ligjin 21/2024. Atëherë Jaupaj reagoi sërish.

“Nuk jam këtu për të bërë reels e radhës, jam këtu si drejtues i njësisë numër 7”, u shpreh ai.

Pamjet nga momenti janë shpërndarë në rrjet nga vetë protestuesit. Sipas tyre, takimet e Pranisë Besnike nuk janë të hapura për publikun. Ata pretendojnë se në to marrin pjesë vetëm “organizata socialiste”.