Poloni, dy ditë zie kombëtare pas sulmit të përgjakshëm në Krakovë

Polonia shpall dy ditë zie kombëtare pas masakrës me armë në Krakovë

Kryeministri polak Donald Tusk bëri të ditur shpalljen e dy ditëve zie kombëtare në të gjithë Poloninë, pas sulmit të rëndë me armë zjarri në Krakovë, ku gjashtë persona humbën jetën dhe 16 të tjerë mbetën të plagosur.

Njoftimi u dha gjatë një konference për media të mbajtur në Krakovë. Sipas Tusk, e diela, 8 nëntor, dhe e hëna, 9 nëntor, do të jenë ditë zie kombëtare në nivel kombëtar.

Sulmi u regjistrua të shtunën, rreth orës 15:00, afër Sheshit Kryesor (Rynek Główny), në qendrën historike të qytetit. Autoritetet thanë se një person hyri me automjet në zonën e sheshit dhe qëlloi drejt kalimtarëve të rastësishëm.

Gjashtë qytetarë u vranë dhe 16 të tjerë pësuan plagë, përfshirë dy policë. Pesë shtetas të huaj janë në mesin e të plagosurve, ndërsa mes viktimave raportohet edhe një shtetas britanik.

Policia ndërhyri ndaj sulmit dhe qëlloi të dyshuarin, i cili më pas u arrestua dhe u dërgua në spital për trajtim mjekësor.

Sipas autoriteteve polake, i dyshuari është shtetas polak, rreth 25 vjeç. Ministri i Brendshëm, Marcin Kierwiński, deklaroi se hetimet paraprake kanë zbuluar shenja të ndikimit nga ideologjia e ekstremit të djathtë dhe pikëpamje ultranacionaliste.

Megjithatë, motivi i saktë i sulmit dhe rrethanat e plota të ngjarjes mbeten objekt hetimi.

Një tjetër zhvillim tronditës u bë i ditur nga kryeministri Donald Tusk gjatë konferencës për media.

Sipas tij, në banesën e të dyshuarit, në qytetin Ostrowiec Świętokrzyski, janë gjetur trupat e pajetë të tri personave: dy grave dhe një burri, të cilët dyshohet se janë familjarë të tij.

Autoritetet po hetojnë edhe lidhjen e mundshme të këtyre vdekjeve me sulmin në Krakovë.