“Po Arkivi çfarë ju ka bërë?”- Protestuesit dogjën Arkivin e Shtetit, Vengu: Çfarë ambicieje e përligj këtë egërsi?

Deputeti i Partisë Socialiste, Pirro Vengu, ka reaguar pas incidenteve të regjistruara gjatë protestës, duke u ndalur te dëmtimi i institucioneve dhe simboleve që, sipas tij, nuk mund të justifikohen me pakënaqësinë ndaj qeverisë apo politikës.

Ai përmend konkretisht Arkivin Qendror të Shtetit, Nunciaturën Apostolike, flamurin e Selisë së Shenjtë dhe institucionet që lidhen me Bashkimin Europian.

Reagimi i Piro Vengut:

“Le ta ndjekim deri në fund arsyetimin e komentuesve të elitës dixhitale pa mandat, që kanë vërshuar sërish sot për të intimiduar këdo që nuk mendon si ata:

E zëmë se institucionet i digjni për faj të të korruptuarve. E zëmë se dyqanet dhe bankat i kanë oligarkët. E zëmë se mediat janë të shitura.

Po Arkivi Qendror i Shtetit? Institucioni që ruan kujtesën tonë kolektive, ku mbrohen e studiohen dëshmitë e historisë, të gjuhës dhe të trashëgimisë sonë shpirtërore?

Arkivi çfarë ju ka bërë?

Po Nunciatura Apostolike dhe flamuri i Selisë së Shenjtë? Po flamuri europian? Po selia e Kolegjit të Europës? Çfarë ju kanë bërë?

Çfarë padrejtësie ndreqni duke vënë në rrezik kujtesën tonë? Çfarë të ardhmeje ndërtoni duke përdhosur simbolet që na lidhin me Europën?

Çfarë ambicieje e përligj këtë egërsi?”