Përsëri arbitra shqiptarë në Nations League, pas Juxhin Xhajës, në fushë zbret Enea Jorgji! Ja ndeshja që do gjykojë

Arbitrave shqiptarë u është besuar sërish drejtimi i ndeshjeve në UEFA Nations League këtë edicion.

Pas Juxhin Xhajës, i cili arbitroi me sukses përballjen mes Sllovakisë dhe Moldavisë, ftesa e radhës ka shkuar për Enea Jorgjin. Gjyqtari elbasanas do të dalë në fushë për një sfidë të Ligës C, aty ku pritet të ndajë drejtësinë me përvojën e tij ndërkombëtare.

Bëhet fjalë për duelin Luksemburg - Islandë, i programuar të luhet të martën në mbrëmje në stadiumin kombëtar të Luksemburgut.

Në krah të tij do të jenë asistentët Denis Rexha dhe Ridiger Çokaj, ndërsa Ermis Çelaj do të kryejë detyrën e gjyqtarit të katërt.

Vëmendja është edhe te dhoma VAR, ku spikat emri i italianit Daniele Doveri. Emri i tij u përmend në hetimet ndaj ish-shefit të arbitrave të Serie A dhe Serie B, Gianluca Rocchi.

Në këtë ndeshje Doveri do të jetë VAR kryesor, me Albert Dodën si asistent.