Përfshihet nga flakët lokali në Athinë ku u vra Pëllumb Islami, autoritetet hetojnë për zjarrvënie të qëllimshme

Panik ka përfshirë banorët e Nea Ionia-s në Athinë në orët e para të së hënës. Një kafene në rrugën “Kastamonis” u përfshi nga flakë të mëdha. Zjarri ka shkaktuar dëme të konsiderueshme materiale.

Sipas informacioneve, flakët kanë nisur në katin përdhes. Më pas ato u përhapën me shpejtësi në tre katet sipër. Banorët e ndërtesës u detyruan të largoheshin me urgjencë.

Në vendngjarje u angazhuan 18 zjarrfikës me pesë mjete operacionale. Me ta ishte edhe një automjet i posaçëm me shkallë për ndërhyrje nga lart. Ekipet arritën të shpëtonin disa persona të bllokuar në ballkone. Të tjerë po përpiqeshin të dilnin përmes tymit të dendur dhe u nxorën shëndoshë e mirë. Dëshmitarë nga zona kanë treguar se para flakëve u dëgjua një shpërthim i fortë në katin përdhes.

Lokali i djegur nuk është i panjohur për autoritetet. Në të njëjtin ambient, më 22 shkurt 2023, 37-vjeçari shqiptar Pëllumb Islami u ekzekutua me armë zjarri.

Autoritetet greke kanë hapur hetime për ngjarjen. Hetuesit po përpiqen të qartësojnë shkaqet e plota të shpërthimit. Në fokus janë dy pista kryesore. E para lidhet me një defekt teknik, si shpërthimi i bombolës së gazit. Pista tjetër është ajo e zjarrvënies së qëllimshme me prapavijë kriminale.