Operacioni antidrogë në shkollat e Tiranës| Shpërndarësit vepronin në 8 grupe, goditen dhe 5 furnitorë

Blutë e kryeqytetit arrestuan dje 31 persona në Tiranë, në kuadër të një operacioni kundër shitjes së drogës pranë institucioneve arsimore. Nga i njëjti operacion ishin arrestuar më parë edhe 7 persona të tjerë. Aktualisht 14 persona janë shpallur në kërkim.

Sipas raportimit të Besar Bajraktarajt për Klan News, në aktivitet ishin përfshirë 8 grupe. Ato vepronin në Laprakë, Brakë, Jordan Misja, Selitë, Yzberisht, Allias, te Tregu Elektrik dhe te Qyteti Studenti. Çdo grup kishte 3 deri në 4 shitës, dhe kur një grup mbetej pa lëndë, klientët dërgoheshin te grupi tjetër.

Dokumentimi u bë përmes agjentëve të infiltruar dhe blerjeve të stimuluara. Fokusi i operacionit ishte shitja pranë shkollave. Po ashtu u goditën 5 furnitorë të dyshuar për sigurimin e heroinës dhe kokainës.

Hetimi ka zgjatur plot 4 muaj. U sekuestruan 1 kg e 75 grame heroinë, 1 kg e 265 grame kokainë dhe 685 grame Cannabis Sativa. Po ashtu u gjetën 1 pistoletë, 90 fishekë, 2 peshore elektronike, 12 automjete, 35 telefona celular dhe sende të tjera të kundraligjshme.

Shpërndarja bëhej me monopatina, taksi dhe shërbim delivery. Kjo metodë përdorej për t'i shpëtuar policisë në terren.