Notat e Shqipërisë/ Asllani i Arabisë më i mirë se i Interit, i krisuri Hysaj, Muçi është kapelja magjike

Shqipëria mori një fitore të pastër 2-0 kundër Bjellorusisë. Kuqezinjtë bindën plotësisht me paraqitjen e tyre nën drejtimin e Maranit. Për këtë duel, ABC24.AL ka publikuar notat për disa nga protagonistët e Kombëtares.

Kristjan Asllani u vlerësua me notën 7. Sipas këtij vlerësimi, “çuditërisht Asllani i Arabisë ishte më i mirë se Asllani i Interit. Më shumë klas në këmbë, nuk luante vetëm me Gjimshitin dhe Ismajlin, shihet më shumë përpara. Nuk e dimë se çfarë e tjetërsoi, paratë në aventurën e re apo minutat më shumë atje, por Asllani mund të qëndrojë në Emiratet e Bashkuara Arabe për sa kohë luan kështu te Kombëtarja”.

Elseid Hysaj mori 8. Për kapitenin thuhet se “Elsi Hysaj është “i krisur”. Ky njeri nuk është normal, për sa kohë luante në Serie A, te Shqipëria bënte ndeshje të dobëta. Tani që nuk luan në Serie A, te Shqipëria është më i miri. Ndodhi në dy ndeshjet me Serbinë, ndodhi dje dhe po ndodh gjithmonë në kohët e fundit, Elseid Hysaj është i pakalueshëm. Dhe e ka një shpjegim dhe kjo utopi, Hysaj është fantastik kur luan thjeshtë dhe kupton limitet e vetes, kur luante në Serie A, bënte gjëra që kapaciteti i tij nuk e mbante”.

Për Pilon nota ishte 6.5. Vlerësimi thekson se në 45 minutat e para thuajse çdo aksion i bjellorusëve kalonte nga krahu i tij. Ashtu si Mitaj, edhe ai shfaqet më i brishtë në detyrat prapa. Por befason kur i jep gazit dhe shpërthen drejt sulmit. Shpërthimi dhe dinamika e tij shkojnë përtej asaj që ofron Mitaj. Madje dje, pa top, ai ndoshta regjistroi shpejtësinë më të madhe në fushë.

Arbër Hoxha u notua me 7.5. Kur e gjen formën më të mirë, askush nuk e ndal dot në krah. Ai ishte i vetmi që ngrinte në këmbë tribunën në “Air Albania”. E bëri kundërshtarin të dukej modest. Merrte topin dhe i kalonte rivalët si të donte. Me tunel, nga jashtë, nga qendra. Luajti me ta pa asnjë mëshirë.

Ylber Ramadani mori 7. Ndoshta nuk është futbollisti më elegant për sy. Por dje ishte fantastik. Meritonte vlerësimin maksimal. Ishte kudo në mesfushë. Rikuperonte topa pa pushim. Dhe nuk vononte asnjë sekondë për të nisur aksionin pasardhës.

Ernest Muçi u vlerësua me 8. “Ernest ku ishe? Na kishe munguar! E kishim pritur kaq gjatë dhe e tregoi se çfarë mund të bënte. Ishte një ndeshje e dobët e Muçit, por Muçi prapë shkëlqeu dhe shënoi, imagjinoni se çfarë mund të bëjë në kulmin e tij. E bën futbollin të duket aq i bukur, aq i thjeshtë, aq mbreslënës. Dhe Redi Jupi e tha më bukur: “Edhe kur e humbet një rast para porte, e humb aq bukur sa nuk e kritikon dot”. E donim një shkëndijë dhe Muçi e dha”.

Rei Manaj u ndal te 5.5. Ai çaloi më shumë se të tjerët dje. Donte me çdo kusht të gjente golin. Por pikërisht kjo dëshirë e tepruar e bllokoi. Tek rrjeta e Muçit, thuajse ia prishi aksionin shokut të skuadrës. E vuri në rrezik më shumë se mbrojtësit kundërshtarë. U pa konfuz në disa raste. Gaboi në vendimet kyçe. Dhe shpërdoroi një mundësi ideale në pjesën e parë.