“Një moment krenarie për Shqipërinë”/ Rama reagon pas publikimit të Raportit të Progresit: Dera e BE e hapur, mundësia e hyrjes më reale se kurrë!

Rama: Pas Raportit të Progresit, dera e BE-së është e hapur dhe hyrja më reale se kurrë

Kryeministri Edi Rama e quajti sot publikimin e Raportit të Progresit të BE-së, më 4 nëntor, “një moment krenarie për Shqipërinë”. Në platformën X ai shkroi se dera e BE-së është e hapur dhe mundësia e hyrjes është më reale se kurrë.

Në postim, Rama theksoi se raporti vjetor i progresit vlerëson Shqipërinë më lart se kurrë më parë. Ai e cilësoi këtë si një tjetër moment krenarie për Shqipërinë Europiane dhe si një tjetër dëftesë notash domethënëse e inkurajuese nga Komisioni Europian. Sipas tij, ky është edhe një tjetër hap përpara drejt objektivit historik të bashkimit me Europën.

Megjithatë, kryeministri pranoi se detyrat përpara janë ende të shumta. Koha e kalendarit të ngjeshur të negociatave, tha ai, po bëhet gjithnjë e më e ngushtë. Ai shtoi se vlerësimi i lartë nuk i bën më të vogla, as më pak aktuale, problematikat e jetës së përditshme të vendit.

Këto problematika, sipas Ramës, kanë pasur, kanë dhe do të kenë të gjithë vëmendjen e tij, të qeverisë dhe të shumicës parlamentare. Përkundrazi, vlerësimi i lartë i raportit të sotëm na motivon për të bërë ende më shumë dhe për t’i bërë gjërat ende më mirë.

“Momenti është optimal. Dera e BE është e hapur dhe mundësia e hyrjes është më reale se kurrë. Historia nuk do të na e falte kurrësesi mbytjen në lugën e ujit të pistë të dasive, mllefeve e gjelozive që e kanë penguar vazhdimisht Shqipërinë të ngrihet në lartësinë e potencialit të saj.” shkroi Rama.