Ngërçi me pagat, sot mblidhen magjistratët në KLGJ! Administrata e Gjykatave të Tiranës, Vlorës, Fierit dhe Lushnjës hyjnë në ditën e tretë të bojkotit

Përballë bllokadës së pagave, sot në orën 10:00 (10 shtator) pritet të mbahet një mbledhje e jashtëzakonshme në Këshillin e Lartë Gjyqësor. Magjistratët do të diskutojnë ngërçin financiar që ka prekur të drejtën e tyre për kompensim.

Në Gjykatën e Tiranës, punonjës administrate dhe sekretarë gjyqësorë, si nga Dhomat Civile dhe Penale, vazhdojnë mosfunksionimin e shërbimeve. Sot shënohet dita e tretë e bojkotit deri në marrjen e rrogave të vonuara. Puna mbetet pezull edhe në gjykata të tjera të vendit, si në Vlorë, Fier e Lushnjë. Gjykata e Apelit nuk i është bashkuar këtij bojkoti, pasi ligji ua ndalon gjyqtarëve të kryejnë protesta të tilla.

Situata u krijua pas vendimit të përbashkët të KLGJ dhe Këshillit të Lartë të Prokurorisë. Këto organe vendosën të përcaktojnë vetë pagesat e magjistratëve. Vendimi erdhi si rezultat i mosveprimit të Kuvendit për të gjetur një zgjidhje ligjore ndaj detyrimit të ripërllogaritjes së pagave. Kjo detyrim ishte shpallur me vendimin e Gjykatës Kushtetuese.

Institucioni legislativ ka bërë me dije se konflikti do të adresohet në Kuvend. Seancë parlamentare është parashikuar për datën 17 shtator. Sipas kuadrit ligjor e kushtetues në fuqi, magjistratët nuk kanë të drejtë të vendosin vetë për nivelin e rrogave të tyre.