Nga Dibra në Gjirokastër, Shqipëria në luftë me flakët! Ministria e Mbrojtjes: 8 vatra ende aktive, nuk ka rrezik për banorët! Zonat problematike

Ministria e Mbrojtjes ka aktualizuar të dhënat mbi flakët që kanë përfshirë vendin, duke konfirmuar se numri i vatrave aktive është ulur në tetë. Sipas të dhënave të përditësuara deri në orën 20:00 të datës 28.08.2026, në total janë regjistruar 17 vatra zjarri, nga të cilat pesë janë shuar plotësisht dhe katër të tjera mbahen nën mbikëqyrje.

Situata është e ndryshme në zona të ndryshme të vendit. Në Qafë Priskë, malin e Dajtit në Tiranë, tre vatra janë riaktivizuar, ku në terren ndodhen 25 zjarrfikës dhe punonjës të Agjencisë së Mbrojtjes së Zjarrit. Në afërsi të Bulqizës, në Qafë e Helmës dhe Vajkal, zjarret po përballen me mjete dhe forca të ndryshme, përfshirë 95 trupa dhe një helikopter të Forcave të Armatosura. Megjithatë, nuk ka rrezik për banesat në këto zona.

Në Sllatinë të Dibrës, situata u përkeqësua ndjeshëm gjatë mesditës si pasojë e temperaturave të larta dhe erës. Flakët kaluan në pyll me pisha të larta, por mbi 100 forca dhe një helikopter po punojnë për kontrollimin e tyre pa rrezikuar zonat e banuara. Në Xhyrë të Librazhdit, era favorizoi përhapjen e zjarrit, çhoi në evakuimin e dy banesave dhe në ndërhyrjen me një helikopter.

Në Gjirokastër, në Tërbuq, flakët përfshinë rreth 30 hektarë, por tashmë situata është plotësisht nën kontroll dhe nuk ka më rrezik. Në Dragot të Tepelenës, 30 forca ushtarake dhe tri automjete zjarrfikëse iu bashkuan operacionit. Ndërsa në Çorrush të Mallakastër, puna po vijon me dy automjete dhe tetë efektivë të Mbrojtjes.

Në fshatin Tërbaç, bashkia e Himarës, flakët kanë prekur një sipërfaqe pyjore. Për shuarjen e tyre, janë angazhuar dy automjete me nëntë efektivë, ndërsa ajri mbështetet nga dy helikopterë dhe një avion Air Tractor. Në shkallë vendi, Forcat e Armatosura kanë vënë në dispozicion 50 ushtarë, katër helikopterë dhe avionin e sipërpërmendur.

Agjencia Kombëtare e Mbrojtjes Civile thekson se mbetet në vëzhgim të vazhdueshëm gjithë territorin. Ajo punon në koordinim të ngushtë me autoritetet lokale për të garantuar mbrojtjen e jetës, banesave dhe pasurisë së qytetarëve, duke mbajtur kapacitetet në gatishmëri maksimale.