Ndryshimi i Kodit Zgjedhor has pengesën e parë, nismëtarët kërkojnë më shumë kohë për 20 mijë firmat

Nisma për grumbullimin e 20 mijë nënshkrimeve për ndryshimin e kodit zgjedhor po përballet me pengesën e parë serioze: koha e pamjaftueshme. Gazetarja Elda Menga e Top Channel bëri publike shkresën e dërguar nga grupi nismëtar Komisionit Qendror të Zgjedhjeve, ku kërkohet shtyrja e afatit për mbledhjen e firmave deri më 15 dhjetor.

Në dokument, Kristaq Kume, përfaqësues i komitetit, shpreh shqetësimin e madh se procesi po pengohet nga pamundësia për të mbledhur firmat në kohën e parashikuar. Ai i bën thirrje Komisionerit Ilirjan Celibashi që të shqyrtojë mundësinë e një vendimi të ri.

Kujtojmë se KQZ e autorizoi zyrtarisht këtë nismë më 15 qershor. Ajo u ngrit nga një grup aktivistësh të shoqërisë civile, të udhëhequr nga ish-kreu i KQZ, Kristaq Kume. Paketa e propozimeve të tyre parashikon ndryshime të thella në sistemin zgjedhor.

Mes pikave kryesore janë ndarja e Shqipërisë në katër rajone zgjedhore, implementimi i listave 100% të hapura, si dhe mundësia e kandidimit përmes listave qytetare. Nismëtarët kërkojnë gjithashtu depolitizimin e administratës zgjedhore, lehtësimin e votimit për personat me aftësi të kufizuara dhe rritjen e kontrollit ndaj financimit të partive politike. Sipas propozimit, do të futen edhe masa më të ashpra për ndëshkimin e shkeljeve zgjedhore.