Nderimet për Ratko Mladić në Serbi, ministri Hoxha: Glorifikimi i kriminelëve të luftës bie ndesh me vlerat evropiane

Ministri i Punëve të Jashtme, Ferit Hoxha, reagoi ashpër ndaj nderimeve të dhëna për kriminelin e luftës Ratko Mladiç në Serbi. Ai theksoi se lavdërimi i një figure të tillë shkel parimet evropiane.

Hoxha përmes një statusi në rrjetin social X dënoi faktin se Mladiçi, i cili vdiq në burg pas dënimit me burgim të përjetshëm për gjenocid e krime lufte, po nderohej. Kryediplomati shqiptar bëri të ditur se vendi ynë qëndron krah BE-së dhe udhëheqësve të saj në këtë dënim.

Sipas tij, qëndrimi i Shqipërisë mbetet i palëkundur: glorifikimi i kriminelëve, mohimi i gjenocidit dhe revizionizmi historik janë të papajtueshme me vlerat evropiane. Hoxha shtoi se këto veprime dëmtojnë thellë proceset e pajtimit dhe fqinjësisë së mirë në rajon.

“Shqipëria dënon pa asnjë dyshim këto nderime për Ratko Mladiç, një kriminel lufte të dënuar për gjenocid. Ne i bashkohemi Bashkimit Evropian dhe të gjithë atyre që e kanë dënuar mënyrën se si ai u nderua në Serbi”, deklaroi ministri.

“Qëndrimi ynë është konsekuencë: glorifikimi i kriminelëve të luftës minon themelet e projektit evropian. Ai pengon pajtimin dhe bashkëpunimin në Ballkanin Perëndimor, që janë thelbësore për një të ardhme të përbashkët”, vijoi ai.

Hoxha shtoi se aktet e tilla shkojnë përtej rihapjes së plagëve të vjetra. “Ata fyejnë viktimat dhe të mbijetuarit, duke gërryer besimin ndërmjet komuniteteve dhe njerëzve.”

Ministri nënvizoi besimin e Shqipërisë se pajtimi i vërtetë ndërtohet mbi të vërtetën dhe llogaridhënien. “Duhet respekt për viktimat dhe angazhim që krimet të mos përsëriten kurrë.”

“Rajoni ynë ka një të ardhme për ta ndërtuar së bashku. Ajo e ardhme duhet të jetë evropiane: e rrënjosur në paqe, pajtim dhe respekt të palëkundur për kujtimin e atyre që vuajtën nga lufta”, përfundoi Hoxha.