Ministri izraelit mbërrin në Kryesinë e Kuvendit, takohet me kryeparlamentarin Peleshi! Temë bisedimesh siguria, energjia, ekonomia dhe…

Kryediplomati izraelit Gideon Sa’ar u prit këtë të hënë në Kryesinë e Kuvendit nga kreu i Legjislativit Niko Peleshi. Vizita në selinë e parlamentit erdhi menjëherë pas nënshkrimit të Marrëveshjes për Bashkëpunimin e Përgjithshëm me homologun shqiptar Ferit Hoxha.

Qëndrimi i shefit të diplomacisë izraelite në Tiranë synon forcimin e lidhjeve dypalëshe. Në qendër të axhendës janë dialogu politik, siguria rajonale dhe thellimi i partneritetit mes Shqipërisë dhe Izraelit.

Pak më parë Sa’ar dhe Hoxha firmosën dokumentin që hap rrugën për bashkëpunim më të ngushtë. Marrëveshja mbulon disa sektorë kyç. Bëhet fjalë për ekonominë, tregtinë, teknologjinë, energjinë, arsimin, shëndetësinë dhe sigurinë.

Takimi me Peleshin shihet si një hap i rëndësishëm. Pritet të diskutohet ecuria e marrëdhënieve dypalëshe. Në fokus do të jetë edhe zgjerimi i bashkëpunimit ndërinstitucional mes dy vendeve.