Mbushën shkollat e Tiranës me drogë, Gjykata lë në burg 31 të arrestuarit e operacionit policor!

Gjykata e Tiranës la në burg 31 personat e arrestuar në operacionin antidrogë të koduar “Shkolla të pastra”.

Masa e sigurisë “arrest në burg” u caktua këtë të diel, më 28 shtator.

Aksioni u mbyll një ditë më parë. Ai erdhi pas katër muajsh hetime intensive. Në shënjestër ishin disa grupe të dyshuara për shpërndarjen e lëndëve narkotike në zona të ndryshme të kryeqytetit. Mes tyre edhe perimetri pranë institucioneve arsimore.

Bilanci i operacionit është 31 të ndaluar. Ndërkohë 14 persona të tjerë janë shpallur në kërkim.

Hetimet kanë dokumentuar aktivitetin e grupeve. Sipas provave të mbledhura, ata dyshohet se shpërndanin drogë pranë shkollave 9-vjeçare dhe gjimnazeve të ndryshme në Tiranë.

Për të mos rënë në sy, në disa raste ishte zgjedhur një mënyrë e veçantë lëvizjeje. Hetuesit thonë se shpërndarja kryhej me monopatina, me taksi dhe përmes shërbimeve të shpërndarjes me porosi. Kjo bëhej për t'i shpëtuar kontrollit të policisë dhe për ta bërë më të vështirë identifikimin.