Mbrojtja Civile Saudite lëshoi një seri të shkurtër alarmesh, përfshirë një për qytetin e Mekës

Mbrojtja Civile e Arabisë Saudite aktivizoi të enjten disa alarme të shkurtra në disa zona të vendit. Mes tyre ishte edhe qyteti i Mekës, ku ndodhen vendet më të shenjta për besimtarët myslimanë. Zakonisht sinjale të tilla paralajmërojnë për rrezik nga sulme me raketë apo dron.

Sipas njoftimit zyrtar, Platforma Kombëtare e Paralajmërimit të Hershëm lëshoi një sinjal specifik për Mekën. “Një paralajmërim është lëshuar nga Platforma Kombëtare e Paralajmërimit të Hershëm në Qytetin e Mekës për të paralajmëruar për një rrezik të mundshëm”, thuhej në deklaratë. Paralajmërime të ngjashme u dhanë edhe për Janbunë në bregdetin e Detit të Kuq, si dhe për rajonet Taif, Xhedah dhe Tabuk. Të gjitha alarmet u çaktivizuan pas pak minutash.

Javët e fundit sinjale të tilla janë lidhur shpesh me sulme të ndërmarra nga kryengritësit Houthi në Jemen. Grupi mbështetet nga Irani, raportojnë mediat ndërkombëtare, përcjell ABC24.AL.

Më vonë gjatë së enjtes, zëdhënësi i Koalicionit për Mbështetjen e Legjitimitetit në Jemen, Gjeneral Major Turki al-Malki, dha një deklaratë të re. Sipas tij, forcat saudite kanë kapur gjashtë raketa balistike të lëshuara nga Houthit. Ai theksoi se çdo përshkallëzim dhe shkelje nga ana e tyre do të marrë përgjigje të prerë.

Ndërkohë edhe Mbreti Salman bin Abdulaziz Al Saud reagoi ashpër ndaj lëvizjes Houthi. Ai e cilësoi atë si “milici terroriste” dhe akuzoi grupin e lidhur me Iranin se ka goditur vazhdimisht Mekën e shenjtë. Deklaratat u bënë gjatë mbledhjes së kabinetit të së martës. Lajmi u raportua nga Agjencia Zyrtare Saudite e Lajmeve (SPA), shkruan Al Jazeera, përcjell ABC24.AL.

Vlerësohet se ndërhyrja e drejtpërdrejtë e monarkut 90-vjeçar është e pazakontë dhe me ton të fortë. Në praktikë, menaxhimi i përditshëm i shtetit i është besuar djalit të tij, Princit të Kurorës Mohammed bin Salman.

Monarku shprehu mirënjohje për ushtrinë dhe strukturat e sigurisë. Ai lavdëroi rolin e tyre për “mbrojtjen e atdheut dhe përballjen me vendosmëri ndaj çdo agresioni kundër vendeve të shenjta, pelegrinëve, qytetarëve dhe banorëve të Mbretërisë”. /ABC24.AL/