“Mashtrim publik nga Kushtetuesja”- Rrëzimi i kërkesës së PD-së për Avokatin e Popullit, Bardhi sulmon Gjykatën: Iu shmang transparencës, e papranueshme!

Kushtetuesja rrëzon kërkesën e PD-së për Avokatin e Popullit, Bardhi akuzon Gjykatën për mashtrim publik dhe mungesë transparence

Gjykata Kushtetuese ka refuzuar kërkesën e depozituar nga Grupi Parlamentar i Partisë Demokratike për procesin e përzgjedhjes së Avokatit të Popullit.

Vendimi ka sjellë reagimin e menjëhershëm të kryetarit të grupit parlamentar demokrat, Gazment Bardhi. Ai e ka kundërshtuar publikisht arsyetimin e dhënë nga Gjykata. Sipas tij, qëndrimi i Gjykatës shtrembëron të vërtetën mbi kohën kur PD-ja ka tërhequr mbështetjen për kandidatët.

Bardhi thekson se tërheqja ka ndodhur në datën 5 dhjetor 2025. Ndërkohë, verifikimi i kandidaturave nga Komisioni i Ligjeve dhe përcjellja e tyre për votim në seancë plenare është kryer më 9 dhjetor 2025. Pra, sipas tij, mbështetja është tërhequr katër ditë para se komisioni të merrte vendimin.

Në deklaratën e tij, Bardhi u shpreh ashpër ndaj Gjykatës:

“Mund të kishin thënë thjesht “rrëzohet”, për qëllime politike, pa pasur nevojë të mashtronin publikisht. Në çdo rast, çfarëdo lloj vendimi që do të merrte Gjykata Kushtetuese, ne do ta respektonim di të detyrueshëm për zbatim. Por mashtrimin publik nuk e respektojmë dot; përkundrazi, e përbuzim me përçmim.

Dënoj me forcë shtrembërimin e fakteve dhe provave nga Gjykata Kushtetuese. Një gjykatë që deformon faktet, humbet besueshmërinë."

Më tej, kreu i grupit demokrat citon njoftimin e Gjykatës për shkaqet e rrëzimit. Në dokument thuhet se: “Në rastin në shqyrtim, ky kusht ishte plotësuar në momentin e verifikimit nga Komisioni i Ligjeve të kandidaturave dhe kalimin e tyre për votim në seancë plenare. Në këtë mënyrë, procesi kishte sjellë pasoja konkrete, NDAJ TËRHEQJA E MBËSHTETJES PAS KALIMIT TË KËSAJ FAZE nuk mund të sjellë më pasoja në procedurën vijuese parlamentare.”.

Për Bardhin ky argumentim përbën mashtrim publik. Ai e konsideron atë si një njollë serioze mbi kushtetutshmërinë e vendimmarrjes në këtë rast.

Sipas tij, Grupi Parlamentar i PD-së e ka zyrtarizuar tërheqjen përmes shkresës nr. 3853 Prot., datë 05.12.2026. Në atë moment, Komisioni i Ligjeve nuk kishte përfunduar ende procedurën që Gjykata pretendon se ishte mbyllur. Mbledhja publike ku u bë verifikimi dhe kalimi për votim në Kuvend u mbajt vetëm më 9 dhjetor 2025.

Bardhi lidh këtë shtrembërim me refuzimin e Gjykatës për shqyrtim në seancë publike. Ai thotë se arsyet jokushtetuese për të mos zhvilluar një proces transparent tregohen pikërisht nga ky deformim i fakteve. Sipas tij, një gjykim i hapur do t'i kishte dhënë mundësi opinionit publik të njihej me rrethanat reale.

Në fund të reagimit, ai e cilëson qasjen e Gjykatës si politike dhe të papranueshme. Një institucion që shmang transparencën dhe mashtron mbi fakte lehtësisht të verifikueshme nuk jep drejtësi, por bën politikë, theksoi Bardhi. Kjo, sipas tij, bie ndesh me parimet e shtetit ligjor.