Maksiprocesi ndaj Manchester City, solisti i grupit ‘Oasis’ zbulon sanksionet ndaj klubit anglez!

Çështja e Manchester City-t vazhdon të mbajë ndezur debatin në Angli. Zhurma nuk ka të ndalur dhe tani në diskutim është përfshirë edhe një emër i njohur i muzikës.

Bëhet fjalë për Liam Gallagher, solistin e grupit të famshëm “Oasis”. I njohur si mbështetës i zjarrtë i Citizens, ai ka reaguar ndaj ironive dhe komenteve për ndëshkimet që mund të marrë klubi.

Gallagher iu përgjigj atyre që aludojnë për heqje të madhe pikësh apo edhe rënie nga kategoria. Sipas tij, thashethemet për një dënim sportiv ekstrem janë të pabaza.

Në një postim në rrjetet sociale, këngëtari ndau detaje që thotë se i ka marrë nga lart. “Dikush nga një pozicion shumë të lartë më tha se nëse do të humbasim në apel, gjë që nuk do të ndodhë, do të dënohemi me gjobë dhe bllokim të merkatos së transferimeve, kjo do të jetë e gjitha. Kështu që të gjithë ju, të dëshpëruarit neurotike, mbylleni gojën njëherë e mirë”, shkroi ai. Me këtë deklaratë ai la të kuptohej se informacioni vjen nga një burim shumë pranë kupolës drejtuese që po ndjek procesin gjyqësor.

Që kur u publikua në media vendimi ndaj Manchester City-t, reagimet kanë qenë të shumta. Shumë tifozë anglezë e kanë kritikuar ashpër klubin. Në qendër të kritikave është mënyra se si janë menaxhuar blerjet në merkato gjatë viteve të fundit.

Kërkesa për një ndëshkim shembullor dëgjohet fort. Sidomos tifozët e ekipeve rivale insistojnë për një masë të rëndë. Në shumicën e skenarëve që ata përmendin, dënimi do të nënkuptonte rënien nga kategoria.

Në këtë klimë, Liam Gallagher është kthyer në zërin më të spikatur të atyre që mbrojnë klubin. Ai përfaqëson krahun e tifozëve të Citizens që besojnë te pafajësia e skuadrës. Qëndrimi i tij është i qartë. Nëse apeli rrëzohet, sanksioni duhet të mbetet vetëm administrativ. Ai nuk duhet të prekë rezultatet sportive.