Luftë me zjarret nga Jugu në Veri, 5 zona problematike! Ministria e Mbrojtjes: 12 vatra ende aktive, mbi 800 forca në terren, ndërhyrje dhe nga ajri

**Luftë me zjarret nga Jugu në Veri, 5 zona problematike! Ministria e Mbrojtjes: 12 vatra ende aktive, mbi 800 forca në terren, ndërhyrje dhe nga ajri**

Lufta kundër zjarreve të pyjore në vend mbetet intensive, me struktura operacionale që veprojnë në terren me mbështetje edhe nga ajri.

Sipas një raporti të Agjencisë Kombëtare të Mbrojtjes Civile, përgjatë ditës së sotme janë evidentuar gjithsej 22 vatra zjarri në të gjithë Shqipërinë. Prej tyre, 12 cilësohen ende aktive, 9 ndodhen nën mbikëqyrje, ndërsa 1 vatra është shuar plotësisht.

Për përballimin e situatës janë angazhuar rreth 812 forca. Konkretisht, 498 prej tyre janë trupa vendore dhe lokale, ndërsa 314 janë efektivë të Forcave të Armatosura. Në terren janë dërguar mjete zjarrfikëse e mbështetëse, autoambulanca dhe dronë. Përveç kësaj, janë kryer edhe katër ndërhyrje ajrore me helikopterë.

Në Qarkun Tiranë, vatra në Malin e Dajtit, e përbërë nga pyll ahu dhe shkurre, vijon të jetë aktive. Në operacion janë angazhuar forca zjarrfikëse, të Administratës së Mjedisit dhe të Forcave të Armatosura, së bashku me mjete, autoambulancë dhe një helikopter. Autoritetet bëjnë me dije se nuk ekziston rrezik për zonat e banuara. Ndërkaq, vatra në Kryezi të Kavajës është shuar, kurse zjarri në Malin e Bërzhitës është izoluar dhe po monitorohet.

Në Qarkun Dibër, situata mbetet aktive në katër pika: Vajkal të Bulqizës, Lundër-Madhësh në Mat, Qafën e Helmes po në Bulqizë dhe Cerrujë-Mali i Allushit në Klos. Edhe këtu, raportimet tregojnë se nuk ka rrezik për banesat.

Në Qarkun Lezhë, ende aktive janë vatrat në Gallatë të Kurbinit dhe në zonën Kalivaç-Zimaj-Kashnjet të Bashkisë Lezhë. Në këtë të fundit, janë vënë në lëvizje 100 forca vendore, pyjore dhe vullnetare, të mbështetura nga 124 ushtarë të Forcave të Armatosura, 16 mjete, dy autoambulanca dhe një helikopter. Raportohet se as këtu nuk ka rrezik për ndërtesat.

Në Qarkun Elbasan, zjarri në Malin e Qukësit të Prrenjasit ndodhet nën mbikëqyrje, ndërsa vatra aktive në Gurëshpatë të Librazhdit po luftohet nga forcat e Mbrojtjes nga Zjarri dhe Shpëtimit. Asnjë banesë nuk sipas raportimit, nuk është në rrezik.

Situata në Qarkun Shkodër përfshin disa vatra. Vatra mbi Ludric dhe Shopel në Fushë-Arrëz është nën mbikëqyrje. Aktiv mbetet zjarri në Mnelë të Vogël të Vau-Dejës, ku ndërhyrja mbështetet nga efektivë të FA-së, zjarrfikëse, autobotë dhe helikopterë. Punimet po vazhdojnë edhe në Bardhaj-Myselim, ndërsa vatra në Bërdicë ndiqet nga afër. Edhe në Malin e Tërbunit të Pukës, flakët kanë përfshirë një pyll me pisha. Edhe në këtë qark, nuk ka raporte për banesa të rrezikuara.

Në Qarkun Vlorë, vatra në Bolenë të Himarës po monitorohet, ndërsa në Qesarat të Finiqit zjarri vijon në një sipërfaqe me shkurre. Shuarja e kësaj vatre u mundësua edhe falë ndërhyrjes ajore me një helikopter.

Në Qarkun Fier, situata paraqitet më e qetë. Vatrat në Peshtan dhe Çërrilë janë nën mbikëqyrje, teksa strukturat zjarrfikëse vijojnë monitorimin për të parandaluar riaktivizime.

Në Qarkun Durrës, konfirmohet shuarja e plotë e zjarrit në Halil të Krujës. Ky vendndodhje tashmë po mbahet nën vëzhgim nga Mbrojtja nga Zjarri dhe Shpëtimi i Krujës.

Më në jug, në Qarkun Kukës, vatra në Mamëz të njësisë administrative Kolsh është ende aktive. Zjarri ka përfshirë një sipërfaqe me shkurre dhe pisha, por sipas autoriteteve, nuk paraqet rrezik për zonat e banuara.

Ministria e Mbrojtjes dhe Agjencia Kombëtare e Mbrojtjes Civile njoftojnë se vijojnë të ndjekin situatën në të gjithë territorin, në koordinim me prefekturat, bashkitë dhe strukturat e tjera. "Kapacitetet operacionale mbeten të angazhuara në terren dhe në gatishmëri, me prioritet mbrojtjen e jetës, banesave dhe pasurisë së qytetarëve", theksohet në njoftimin zyrtar.