Luarasi denoncon protestën me fyerje: Vajzat më kishin zënë pritë, poshtërimi nuk është aktivizëm

Deputetja e Kuvendit, Iris Luarasi, ka denoncuar sot një episod në hyrje të Parlamentit. E cilëson atë si të turpshëm dhe plot me fyerje. Thekson se nuk bëhet fjalë për aktivizëm, por për dhunë verbale.

Luarasi publikoi një video në rrjetet sociale. Në të rrëfeu përballjen. Sipas saj, disa vajza e kishin pritur aty për ta sharë e filmuar. "Sot duke hyrë në parlament disa vajza më kishin zënë pritë, me sharje, me fyerje dhe me celularët gati për të filmuar spektaklin që kishin përgatitur," rrëfeu deputetja.

Lidhur me ndjesinë, Luarasi u shpreh se nuk lëndohet nga kritika. Shqetësimi i saj është mënyra se si disa të reja e shohin mbrojtjen e grave. Sipas saj, ato besojnë se poshtërimi është rruga për këtë mbrojtje.

"Dhe patjetër që për një çast u lëndova, jo se nuk e përballoj kritikën, po sepse pashë vajza të reja që besonin se poshtërimi i një gruaje ishte mënyra për të mbrojtur gratë. Më thërritën hajdute, por nderin, punën dhe emrin tim nuk lejoi të mi vjedhë askush. E aq më pak disa vajza që kanë vendosur ta quajnë dhunën aktivizëm", tha ajo.

Situata ishte, sipas deputetes, plotësisht paradoksale. Ata që pretendojnë të mbrojnë gratë, ushtruan fyerje ndaj një gruaje të vetme. "Akuzuan se nuk mbroj gratë ndërkohë që po dhunonin vetë verbalisht një grua. Kjo është vërtetë ironike, po edhe për të ardhur keq. Mbrojtëse të grave me fyerjen në gojë, me telefonin në dorë dhe një grua të vetme që e kishte rrethuar", shpjegoi Luarasi.

Në përmbyllje, ajo u distancua nga kjo formë veprimi. Luarasi bëri të qartë se nuk përfaqëson ato që ngatërrojnë aktivizmin me agresionin. Përkundrazi, mbështet gra të tjera që ngrenë zërin me dinjitet.

“Unë nuk pretendoj të përfaqësoj këto gra që ngatërrojnë aktivizmin me agresionin, protestën me pritën dhe guximin me fyerjen, por përfaqësoj gra dhe vajza të tjera që punojnë dhe e ngrenë zërin me dinjitet, ato që nuk kanë nevojë për një grup, kamera dhe një viktimë për t’u ndjerë të fuqishme”, tha deputetja.

Ajo shtoi se është e hapur ndaj dialogut, por jo ndaj shpifjeve. Rastin e ka denoncuar dhe e ka lënë në duart e drejtësisë. “Kritikën e përballoj, pyetjeve u përgjigjem, por shpifjen, kërcënimin dhe dhunën nuk i pranoj. Prandaj këtë rast do ta denoncoj dhe do t’ia lë drejtësisë të veprojë, sepse fyerja nuk është protestë, poshtërimi nuk është aktivizëm dhe dhuna nuk bëhet më pak dhunë vetëm sepse ushtrohet nga vajza”, përfundoi Luarasi.