“Liria nuk gjykohet”- Majko para vendimit të Hagës: Kujdes nga manipulimi, në Ballkan veset janë kthyer në rregulla! Shqiptarët pa Perëndimin janë jetimë

Ish-kryeministri Pandeli Majko ka shprehur shqetësimin e tij në vigjilje të shpalljes së vendimit në Tribunalin e Hagës më 16 shtator, i cili pritet të përfundojë gjykimin e Hashim Thaçit, Kadri Veselit, Rexhep Selimit dhe Jakup Krasniqit. Ai ka paralajmëruar për rreziqet e mundshme politike nga një aktgjykues eventual i pafavorshëm.

Ish-deputeti socialist u bëri thirrje shqiptarëve që zemërimin e tyre të mundshëm të mos e drejtojnë kundër aleatëve perëndimorë. Paralelisht, ai ka ngritur alarmin se Beogradi dhe aktorë të tjerë të jashtëm mund të tentojnë ta shfrytëzojnë këtë situatë për të nxitur përplasje ndërmjet komunitetit shqiptar dhe mbështetësve të tij në Perëndim.

Reagimi i plotë i Pandeli Majkos:

“LIRIA NUK GJYKOHET…

Urimi për pafajësinë e katër udhëheqësve është sot ngarkuar me një peshë të madhe!

Ai peshon rëndë, pasi ballafaqohet me të papriturën!

Asnjë besim nuk e bën dot një gjë të vërtetë automatikisht!

Gjykimi po futet në fazën finale para shpalljes së vendimit më 16 shtator 2026!

Pritshmëritë rreth këtij vendimi janë të ndara në atë shqiptare dhe atë serbe!

Për keqardhje, edhe kombet e tjera kanë përjetuar ndjesi të ngjashme nga gjykimet e Hagës! Në çdo rast, boshnjakët, kroatët dhe shqiptarët gjenden në një krah, kurse serbët në krahun tjetër!

Metoda e këtyre gjykimeve për t'i shpallur fajtorë të gjithë për luftën që shkatërroi Jugosllavinë nuk ka prodhuar pajtim. Përkundrazi! Ceremonia shtetërore në Serbi për kriminelin e luftës Ratko Mlladiç, i cili vdiq në burgun e Hagës, ishte dëshmi se drejtësia ndërkombëtare atje nuk u pranua si e tillë!

Në Ballkan, historikisht, veset janë kthyer në rregulla!

Me rastin e shpalljes së vendimit, shpresat e politikës antishqiptare dhe të mbështetësve të saj konsistojnë në shfaqjen e një "kryengritjeje" pakënaqësie shqiptare kundër Perëndimit!

Kjo pritshmëri antishqiptare po e nxit këtë ide, e bazuar në mundësinë e dënimit të udhëheqësve të UÇK-së!

Aludimet për një tillë "kryengritje" po bëhen ngadalë, por në mënyrë bindëse!

Strategjia shpreson që zemërimi shqiptar karshi një gjykate ndërkombëtare t'i paraqesë ata si faktor anti-perëndimor. Që nga Beogradi, të tjerë presin që një "vendim negativ" i gjykatësve të barazohet me qëndrimin e Perëndimit ndaj shqiptarëve!

Kosova mund të përballet me një manipulim masiv që mund të shkaktojë dëme të konsiderueshme!

Thaçi, Veseli, Selimi dhe Krasniqi nuk do të pranonin që emri i UÇK-së, jetët e humbura në luftën çlirimtare dhe emrat e tyre të shërbenin si armë kundër Perëndimit!

Nëse skenari negativ materializohet, ai do të ishte prova e rëndë që kombi shqiptar do të kalojë në marrëdhënie të reja me Perëndimin!

Shqiptarët, pa Perëndimin, janë JETIMË!

Kjo ka ndodhur edhe më herët, në Konferencën e Ambasadorëve të vitit 1913!

Përsëritja e historisë do të thotë që Serbia, me Rusinë pas, të negociojë me Perëndimin mbi "kryengritjen" shqiptare!

Beogradi pret vendimin e Hagës dhe ka intensifikuar presionin. Presidenti serb Aleksandër Vuçiç nuk i ka fshehur pritshmëritë serbe kur deklaroi: "Perëndimi dëshiron të thotë se ne jemi të vetmit fajtorë dhe se duhet ta pranojmë këtë, sepse nuk ka pasur krime ndaj jush. Gjakut serb nuk i jepet rëndësi!" (Vini re që Vuçiç lidh vendimin e Hagës me qëndrimin e Perëndimit!)

Pozitën serbe sot e shpjegon edhe Dobrica Qosiq, i konsideruar si "ati i kombit serb". Ai në romanin e tij "Deobe" (1961) shkroi: "Gënjeshtra është interes shtetëror serb… Ne gënjejmë për të gënjyer veten, për të ngushëlluar tjetrin; gënjejmë nga mëshira, gënjejmë nga turpi, për t'u inkurajuar, për të fshehur mjerimin tonë dhe të tjerëve… Gënjeshtra është formë e patriotizmit tonë dhe provë e inteligjencës sonë të lindur."

Politika e Beogradit zyrtar pret që Gjykata e Hagës ta shpallë gënjeshtrën e tyre si të vërtetë!

Vendimi i Hagës për shqiptarët është një çast historik, ku e kaluara kërkon diçka nga e tashmja!

Historia për shqiptarët ka qenë altar i ushqyer me dhimbje dhe sakrificë!

Ajo nuk është shkruar në gjykatë, por ka kaluar prej andej!

Historia shqiptare i ngjan një seance të zgjatur gjyqësore! Kjo seancë ka nisur në vitin 1878 me Lidhjen e Prizrenit! Të akuzuarit fillojnë nga Abdyl Frashëri, Isa Boletini, Ali Ibra…

Përballë vendimit të gjykatës, këshilla më e mirë e traditës shqiptare është të flasësh vetëm kur je i sigurtë se ajo që do të thuash është më e mirë se sa heshtja!

Në Hagë sot janë të burgosur katër shqiptarë që kanë bërë betimin: "… do të jem përherë ushtar besnik, luftëtar i denjë…"

Mospëlqimi i frikacakëve është lavdia e trimave!

Liria e një populli nuk gjykohet!”.