“Ligj i ri për hallet e vjetra”- Propozimet e Ramës për ndryshimet në Kodin Penal, PD akuzon: S’i intereson kush rri në paraburgim me të drejtë ose jo, por…

Partia Demokratike ka reaguar ashpër ndaj propozimeve të kryeministrit Edi Rama për ndryshimet në Kodin Penal. Reagimi ka ardhur nga kreu i Grupit Parlamentar demokrat, Gazment Bardhi.

Sipas Bardhit, kreu i qeverisë po përpiqet të modelojë legjislacionin sipas interesave personale. Ai e ka cilësuar nismën si një përpjekje për të adresuar shqetësime të kahershme të vetë Ramës.

Në një postim publik, Bardhi shkruan se shefit të ekzekutivit nuk i ka interesuar realisht se kush mbahet në paraburgim me baza ligjore dhe kush jo. Përndryshe, sipas tij, nuk do ta kishte kthyer burgun në zgjidhjen e parë për çdo problem social që prej marrjes së pushtetit.

Deputeti demokrat kujton se retorika e burgosjes është përdorur vazhdimisht. Burg për ndërtimet pa leje, burg për çështjet e energjisë, burg për punën informale dhe masa shtrënguese edhe gjatë pandemisë së COVID-19. Sa herë premtimet elektorale nuk u mbajtën, përgjigjja politike ka qenë e njëjtë: më shumë ndëshkim penal, më shumë qeli, thekson ai.

Bardhi ndalet te operacioni i energjisë i tetorit 2014. Vetëm në muajt e parë të atij aksioni u arrestuan mbi 1.000 persona. Kjo qasje pati edhe kosto tragjike. Rasti i Qamil Zelës, 52 vjeç dhe baba i tre fëmijëve, përmendet si shembull. Ai qëndroi dy muaj në paraburgim për një detyrim prej 35 mijë lekësh të vjetra. Më 28 dhjetor 2014, Zela i dha fund jetës brenda qelisë.

Për këtë arsye, argumenton Bardhi, Rama nuk mund të paraqesë sot Këshillin e Europës sikur ka zbuluar tani problemin e paraburgimit në Shqipëri. Institucioni europian e kishte ngritur shqetësimin që në fillimet e qeverisjes së tij.

Më 16 janar 2014, Këshilli i Europës paralajmëroi për përdorim të tepruar të paraburgimit. Ai rekomandoi që masa të aplikohej vetëm si mjet i fundit dhe t'i jepej prioritet alternativave. Raporti i asaj kohe evidentoi se nga tetori i vitit 2013 deri në shkurt 2014, numri i personave në paraburgim ishte dyfishuar.

Shifrat flisnin qartë. Rreth 2.300 persona ndodheshin në paraburgim në atë periudhë. Kjo përbënte afërsisht 40% të popullatës së përgjithshme në burgje.

Pra, sipas kreut të grupit demokrat, kryeministri ka qenë në dijeni. Alarmi europian ishte dhënë herët. Shkaktari ishte identifikuar qartë: qasja e vetë qeverisë.

Bardhi ngre pyetjen se kur iu kujtua Ramës parimi se liria duhet të jetë rregulli dhe burgu përjashtimi. Jo në vitin 2014, kur Këshilli i Europës lëshonte paralajmërimet. As atëherë kur, menjëherë pas ardhjes së tij në pushtet, shifrat e paraburgimit u dyfishuan. Dhe as kur Qamil Zela humbi jetën në qeli për shkak të një borxhi energjie.

Kujtesa, sipas tij, u rikthye vetëm në shkurt të vitit 2025. Kjo përkoi me arrestimin e kryebashkiakut Erion Veliaj.

Më 12 shkurt 2025, vetëm dy ditë pas ndalimit të Veliajt, Rama foli për “burgosje pa gjyq” në rastin e tij. Ai deklaroi se procesi gjyqësor mund të vijonte edhe pa masën e paraburgimit. Pikërisht atëherë, vëren Bardhi, kreu i qeverisë zbuloi edhe “zonën e lirisë” sipas standardeve të Këshillit të Europës.

Por, sipas demokratëve, shqetësimi nuk lidhet me fatin e Veliajt. Rama po mendon për veten e tij, thotë Bardhi. Ai përmend emra konkretë. Ergys Agasi ka shumë për të treguar, po ashtu edhe Belinda Balluku. Të gjithëve, shton ai, u kujtohet deklarata publike se SPAK-u nuk i hapte telefonin kryeministrit.

Ndryshimet e propozuara sot, përfundon Bardhi, e bëjnë të qartë panoramën. Deri më tani Rama ka prodhuar ligje me porosi për të tjerë. Sot po qep një ligj pikërisht sipas masës së tij.