Liga e Kombeve/ Shqipëri për Europian! Kombëtarja fiton me ‘tripletë’ ndaj San Marinos dhe merr vendin e parë në grup (VIDEO)

Shqipëria ka triumfuar me rezultatin 0-3 në transfertën ndaj San Marinos për Ligën e Kombeve. Suksesi solli festë të dyfishtë për kuqezinjtë. Ata morën edhe kreun e grupit, pasi Finlanda bëri hap fals në Bjellorusi.

Golat u shënuan nga Anis Mehmeti dhe Myrto Uzuni në 45-minutëshin e parë, ndërsa Rei Manaj vulosi gjithçka pas pushimit. Me këtë fitore të dytë radhazi, Kombëtarja shkon në kuotën e 6 pikëve.

Trajneri Maran ndërhyri në rreshtim krahasuar me sfidën e fituar 2-0 ndaj Bjellorusisë. Ai bëri disa ndryshime në formacionin titullar.

Në portë u vendos Alen Sherri. Në prapavijë debutoi Sina, ndërsa Mitaj u rikthye nga minuta e parë. Katërshen defensore e plotësuan Berat Gjimshiti dhe Ardian Ismajli.

Në qendër të mesfushës u aktivizuan Kristjan Asllani dhe Juljan Shehu. Anis Mehmeti e nisi si titullar këtë takim. Tridenti ofensiv përbëhej nga Ernest Muçi, Myrto Uzuni dhe Rei Manaj. Të tre nuk zhgënjyen.

Sfida nisi me presion kuqezi. Në minutën e 9-të, Muçi provoi portierin Colombo me një gjuajtje nga larg.

Tre minuta më vonë sulmuesi i Trabzonsporit u shfaq sërish i rrezikshëm. Ai finalizoi një aksion të kombinuar me Uzunin, por diagonaleja shkoi jashtë kuadratit.

Në të 16-tën ishte Asllani që tentoi nga distanca. Topi kaloi pranë shtyllës së majtë të San Marinos.

Rasti i minutës së 20-të i takoi Shehut, i cili goditi nga hyrja e zonës. Colombo grushtoi tentativën e Mehmetit dhe i mohoi golin Shqipërisë.

Goli nuk vonoi. Në minutën e 21-të Anis Mehmeti zhbllokoi shifrat dhe kaloi kuqezinjtë në epërsi.

(Video)

Tetë minuta më vonë erdhi edhe goli i dytë. Uzuni përfitoi nga pritja jo e sigurt e Colombos, pas një goditjeje të fortë nga goditja e dënimit e ekzekutuar nga Manaj. Sulmuesi i Austin FC nuk fali nga afër.

(Video)

Në minutën e 34-t Kristjan Asllani u ndëshkua me karton të verdhë. Tre minuta më pas, Sherri tregoi vëmendje dhe neutralizoi një top të hedhur në zonën kuqezi nga vendasit.

Në të 44-tën Mehmeti depërtoi bukur nga krahu i djathtë dhe provoi një harkim të rrezikshëm. Cevoli ndërhyri dhe shmangu një gol të sigurt.

Arbitri hungarez akordoi dy minuta shtesë në fundin e pjesës së parë. Fraksioni u mbyll me avantazhin 0-2. Autorë të golave ishin Mehmeti dhe Uzuni.

Pjesa e dytë nisi me një zëvendësim te Shqipëria. Maran hodhi në fushë Marash Kumbullën në vend të Gjimshitit.

Në minutën e 58-të Sherri shpëtoi portën me një refleks vendimtar. Ai i mohoi San Marinos golin e parë.

Goli i tretë erdhi në të 65-tën. Rei Manaj shfrytëzoi largimin e gabuar të topit nga mbrojtja dhe portieri vendas dhe vulosi fitoren.

(Video)

Një minutë më vonë stafi kuqezi bëri dy lëvizje të tjera. Hoxha dhe Shpendi zëvendësuan përkatësisht Muçin dhe Manajn.

Më pas Shqipëria administroi lojën dhe rezultatin. Të dyja skuadrat kryen zëvendësime të tjera.

Në minutën e 74-t erdhi një tjetër moment i veçantë. Qefalija veshi për herë të parë fanellën kuqezi, duke hyrë në vend të Shehut.

Në të 91-tën Sina tentoi me kokë nga një pozicion i vështirë.

Ndeshja u mbyll 3-0 për Shqipërinë. Kuqezinjtë ngjiten në vendin e parë të grupit.