Lider i ri në PD? Berisha: Do të them “Goodbye” vetëm nëse kam pamundësi fizike ose mendore

Berisha: Largohem nga PD vetëm nëse më mungon mundësia fizike ose mendore

Kreu i PD-së, Sali Berisha, komentoi mundësinë e një lidershipi të ri në parti.

Në Euronews, ai tha se largimi nga drejtimi i PD-së do të ndodhë vetëm nëse ndjen se nuk ka më mundësi fizike ose mendore për detyrat.

“Momentin që unë të ndjej pamundësinë më të vogël në detyrimet e mia, fizike ose mendore, absolutisht, me lehtësi dhe pa vështirësi do të them ‘Goodbye’. E kam ligj unë këtë, por në kohën kur unë ndiej të njëjtën performancë dhe me një eksperiencë shumë të çmuar, unë nga beteja…do e vazhdoj”, u shpreh Berisha.

Pyetur nëse Belind Këlliçi mund të bëhet lider i ri i PD-së, Berisha tha se gara për drejtimin e partisë mbetet e hapur, por pa vënë afat për largimin e tij.

Ai ndaloi edhe te përplasja me Lulzim Bashën. Sipas tij, rikthimi në krye të PD-së erdhi pas konstatimit se po synohej kontrolli i partisë dhe se Basha kishte vepruar kundër tij.

“U riktheva për dinjitetin tim, për dinjitetin e Partisë Demokratike”, deklaroi Berisha.

Ai foli edhe për motivimin për të vijuar betejën politike. Përballjen me Edi Ramën e cilësoi si një nga periudhat më interesante të jetës së tij politike.

“Unë nuk jam demon pushteti. Unë kam pasur të gjitha pushtetet. Po tani luftoj me një përkushtim. Këto vite kanë qenë vitet më interesante të jetës sime, sepse beteja kundër një diktature të dytë është jashtëzakonisht motivuese”, tha kreu i PD-së.

Berisha akuzoi kryeministrin Rama se zgjedh të qëndrojë në pushtet me çdo kusht. Situatën aktuale politike e krahasoi me fundin e regjimit komunist në Shqipëri dhe zhvillimet në Rumani.