Kapet ngarkesa me 660 kg veshje të padeklaruara nga Turqia, mes tyre marka luksoze!

Dogana Shqiptare ka sekuestruar 660 kilogramë mallra të padeklaruara që vinin nga Turqia. Bëhet fjalë kryesisht për veshje me etiketa të markave të njohura ndërkombëtare. Operacioni u zhvillua në bashkëpunim me Degën Doganore Tiranë, gjatë verifikimit të një mjeti transporti me ngarkesë grupazhi.

Kontrolli fizik zbuloi sasinë e madhe të artikujve të fshehur. Mes tyre kishte veshmbathje që mbanin logot e BOSS, Moncler, Loro Piana dhe Polo Ralph Lauren. Të gjitha rezultuan të padeklaruara në dokumentacionin shoqërues.

Aksioni u organizua nga strukturat e Drejtorisë së Përgjithshme të Doganave. Në të u angazhuan Sektori i Monitorimit dhe njësitë për Mbrojtjen e të Drejtave të Pronësisë Intelektuale, së bashku me degën e kryeqytetit. Përzgjedhja e kamionit për verifikim u bë mbi bazën e analizës së riskut lokal dhe informacioneve të siguruara më parë.

Pas konstatimit të shkeljes dogana mori masat e parashikuara nga ligji. Mallrat u sekuestruan menjëherë. Ndaj subjektit u vendos edhe sanksion administrativ. Gjobë sa gjashtëfishi i detyrimit doganor të papaguar, sipas legjislacionit në fuqi.

Sipas autoriteteve, kontrolle të tilla synojnë goditjen e kontrabandës. Qëllimi është parandalimi i shmangies së detyrimeve dhe mbrojtja e pronësisë intelektuale.

Administrata Doganore thekson se mbetet e angazhuar plotësisht në këtë drejtim. Fokusi është forcimi i mbikëqyrjes, ruajtja e interesave financiare të shtetit dhe garantimi i konkurrencës së ndershme. Ajo kërkon respektimin e detyrimeve ligjore nga çdo operator.