“Jo celularëve në seanca”- Maks Haxhia: U kemi dërguar kërkesë, por GJKKO nuk u ka kthyer përgjigje avokatëve! Shkelen të drejtat

**“Jo celularëve në seanca”- Haxhia: Kërkesa për rishikim, por GJKKO pa përgjigje! Çështje të drejtash**

Kreu i Dhomës Kombëtare të Avokatisë, Maks Haxhia, është shprehur kundër rregullores së re të Gjykatës së Posaçme Kundër Korrupsionit dhe Krimit të Organizuar (GJKKO), e cila ka ndaluar përdorimin e telefonëve celularë gjatë zhvillimit të seancave gjyqësore.

Haxhia ka sqaruar se Avokatia i ka dërguar një kërkesë zyrtare GJKKO-së që të rishikojë këtë masë. Megjithatë, deri në datën 8 shtator, institucioni gjyqësor nuk iu ka kthyer një përgjigje avokatëve.

Sipas kreut të Dhomës, kjo rregullore është në kundërshtim të hapur me Konventën Europiane për të Drejtat e Njeriut, me praktikën e gjykatës së Strasburgut dhe me Kodin e Procedurës Penale. Mungesa e një reagimi nga ana e GJKKO-së e ka cilësuar si një “mungesë respekti institucional” ndaj profesionistëve të uniformës.

“Që në momentin që u bë publike kjo rregullore, unë dhe kryetari i Dhomës së Avokatisë së Tiranës reaguam menjëherë në media. E cilësuam si një akt të paligjshëm që shkel disa standarde themelore”, ka deklaruar Haxhia.

Ai shtoi se pas reagimit publik, Avokatia dërgoi dhe një shkresë zyrtare tek GJKKO për rishikimin e vendimit. “I dërguam letër me kërkesën për rishikim. Sot, që është 8 shtatori, nuk kemi asnjë reagim. Të paktën të na njoftojnë se e morën kërkesën. Kjo shfaq një trajtim jo të denjë ndaj avokatëve gjatë ushtrimit të detyrës së tyre”, u shpreh Haxhia.

Përveç kësaj, kreu i Dhomës Kombëtare ka tentuar të sigurojë një takim të shpejtë me kreun e Këshillit të Lartë Gjyqësor (KLGJ) për të diskutuar mbi këtë çështje. Por, sipas tij, i është komunikuar se KLGJ-ja nuk ka planifikuar mbledhje deri në datën 15 shtator.

“Kërkesën për takim urgjent ja bëra drejtpërdrejt kreut të KLGJ-së. Më thanë se këshilli nuk mblidhet para datës 15. Ne insistojmë që ky takim duhet të ndodhë sa më parë”, përfundoi Haxhia.