Italia ndalon zyrtarisht burkat dhe nikabet në shkolla, arsyetohet Meloni

Qeveria italiane ka vendosur ndalimin e mbulesave që fshehin fytyrën në shkolla, përfshirë burkat dhe nikabet. Masa gëzon mbështetjen e hapur të kryeministres Giorgia Meloni, e cila deklaroi se askush nuk duhet të detyrohet të mbulojë fytyrën.

Vendimi është pjesë e një pakete më të gjerë për integrimin në arsimin italian. Krahas ndalesës për mbulimin e plotë, ekzekutivi parashikon edhe kufizime për numrin e nxënësve me origjinë të huaj brenda një klase.

Sipas Melonit, nxënësit dhe familjet e tyre kanë nevojë të integrohen përmes gjuhës. Ajo theksoi mësimin e italishtes, njohjen e kulturës dhe respektimin e ligjeve të vendit si çelës për këtë proces.

Kryeministrja e konsideron mbulimin e të gjithë fytyrës në kundërshtim me lirinë vetjake. Një praktikë e tillë, sipas saj, bie ndesh edhe me frymën e hapjes që duhet të mbizotërojë në mjedisin shkollor.

Ndalesa nuk prek shaminë tradicionale të kokës. Për t'u kthyer në ligj, nisma duhet të kalojë ende në Parlament.

Njoftimi u bë gjatë një takimi me të rinjtë organizuar nga partia e saj, Vëllezërit e Italisë. Deklarata vjen në një moment kur integrimi i emigrantëve dhe menaxhimi i migracionit mbeten tema qendrore të debatit politik në Itali.