Ilir Alimehmeti tregon nëse do kandidojë për Bashkinë e Tiranës: PD do e diskutojë me aleatët, unë do futem në proces

Ilir Alimehmeti ka folur sot për përgatitjet për zgjedhjet lokale të 2027-ës në Tiranë. Më parë, ai ka kandiduar për deputet nga Partia Demokratike. Në fjalën e tij u ndal te dinamikat brenda shumicës aktuale, si dhe te mënyra sesi opozita duhet të zgjedh kandidatin e saj.

Komentet e tij erdhën pas pyetjeve për disa emra nga PS që u përfolën si të mundshëm për kryeqytetin. U përmendën Erion Braçe dhe Ogerta Manastirliu. Sipas Alimehmetit, tek mazhoranca duket se ka më shumë vëmendje tek rivaliteti i brendshëm për pushtet. Kjo sesa tek ndonjë ofertë e vërtetë zhvillimore për Tiranën.

"News24" e pyeti nëse ai vetë synon të jetë kandidat në garë. Përgjigja e tij ishte se PD dhe aleatët do të mblidhen për të diskutuar modelin e përfshirjes në këtë garë. "Mendoj se duhet të shkojmë përtej siglave, për ndryshim të sistemit e modelit të qeverisjes", u shpreh ai. "Do të jetë një proces, ose primare, ose seleksionim, ose një komision për vendimmarrje. Unë do të futem në atë lloj procesi, por vendimi përfundimtar u takon atyre", shtoi Alimehmeti.

I pyetur më tej për strategjinë e opozitës, ai nënvizoi nevojën që gara të kapërcejë kufizimet e ngushta partiake. Sipas tij, duhet t'i ofrojë qytetarëve një alternativë për ndryshim real të mënyrës së qeverisjes.