Identifikohet një nga autorët e grabitjes në “Rrugën e Kombit” në 2021, shpallet në kërkim 36-vjeçari

Një nga të dyshuarit e grabitjes me armë zjarri të 31 gushtit 2021 në Rrugën e Kombit, në Mirditë, është identifikuar nga Policia e Lezhës. Gjatë ngjarjes, shtetasit A. K. iu vodh një shumë parash nën kërcënimin e armës së zjarrit.

Pas hetimeve të thelluara, Sektori për Hetimin e Krimeve të Rënda dhe Seksioni për Hetimin e Krimeve të Pasurisë, nën drejtimin e Prokurorisë së Lezhës, e identifikuan si autor të dyshuar shtetasin N. K. Ai është 36 vjeç dhe banues në Pukë.

Gjykata e Lezhës ka vendosur ndaj tij masën e sigurisë “Arrest në burg”, ndërsa policia vazhdon kërkimin për kapjen e tij.

Hetimet kanë zbuluar edhe një person tjetër të dyshuar për përfshirje në ngjarje, por për arsye hetimore nuk janë bërë publike të dhëna të tjera për të.

Policia vazhdon kërkimin e 36-vjeçarit, dokumentimin e plotë të grabitjes dhe identifikimin e autorëve të tjerë të mundshëm.