Grabiti nën kërcënimin e thikës çantën e shtetases gjermane te Liqeni Artificial, policia kap ‘skifterin’ e dyshuar!

Pranga 41-vjeçarit që grabiti me thikë shtetasen gjermane te Liqeni Artificial

Policia e kryeqytetit arrestoi autorin e dyshuar të grabitjes me dhunë te Liqeni Artificial.

Bëhet fjalë për shtetasin J. S., 41 vjeç, banues në Tiranë.

Ai akuzohet se nën kërcënimin e thikës i mori çantën me sende personale një shtetaseje gjermane. Ngjarja ndodhi në zonën e Liqenit Artificial.

Vetëm një ditë pas grabitjes, viktima me iniciale T. K., 50 vjeçe, u paraqit në Komisariatin Nr. 1. Shkoi për të falënderuar efektivët që zbardhën rastin.

Sipas njoftimit të Policisë së Tiranës, shtetasja gjermane vlerësoi reagimin e shpejtë të strukturave. Ajo shprehu mirënjohje për identifikimin në kohë rekord të autorit të dyshuar dhe për profesionalizmin e treguar. Sendet personale iu kthyen pasi policia i gjeti.

Shërbimet e Komisariatit Nr. 1 u angazhuan menjëherë sapo morën njoftimin për vjedhjen me dhunë. Menjëherë pas denoncimit u organizua operacioni policor i koduar "Reaction".

Falë veprimeve të shpejta hetimore dhe operacionale u bë i mundur identifikimi, kapja dhe ndalimi i 41-vjeçarit. Policia sqaroi se sendet e vjedhura u gjetën dhe iu dorëzuan 50-vjeçares.

Materialet procedurale iu referuan Prokurorisë për veprime të mëtejshme. I dyshuari do të hetohet për veprën penale "vjedhja me dhunë".