Gjykata pranon kërkesën e Prokurorisë, liron 14 protestuesit që u përplasën me Policinë: Arrestimi i paligjshëm!

Gjykata e Tiranës ka pranuar kërkesën e Prokurorisë dhe ka vendosur lirimin e 14 personave të arrestuar gjatë protestës së 1 shtatorit. Këta individë ishin ndaluar pasi rrethuan godinën e Kryeministrisë. Ngjarja ndodhi në një kohë kur kryeministri Edi Rama ndodhej brenda zyrës së tij.

Arrestimet e tyre u kryen me dyshimin për disa vepra penale. Ato përfshinin organizimin dhe pjesëmarrjen në grumbullime të paligjshme. Gjithashtu u akuzuan për kundërshtimin e punonjësit të policisë së rendit publik, si dhe për prishjen e qetësisë publike e pengimin e qarkullimit të mjeteve.

Gjatë seancës së gjykimit, të arrestuarit kërkuan që masa e tyre të shpallej e paligjshme dhe liroheshin pa asnjë garanci. Ata deklaruan se nuk kishin kryer asnjë vepër penale. Edhe Prokuroria iu bashkua kësaj kërkese, duke kërkuar lirimin e të gjithëve.

Avokatja Eda Grimci, që mbrojti disa nga protestuesit, komentoi vendimin. “Nuk është hera e parë që Gjykata e Apelit konstaton arrestime të paligjshme. Dy raste prej meje do bëjmë kallëzim penal”, u shpreh ajo.