“Familjet kanë pritur mjaftueshëm!”- Ministri Demo në Kombinat: Rindërtimi duhet të ecë me ritëm, deri te çelësi i shtëpisë së re!

Punimet për pastrimin e sheshit tek rruga “Shaban Bardhoshi” në Kombinat kanë nisur. Ato i hapin rrugë ndërtimit të banesave të reja për familjet që ende presin mbylljen e procesit të rindërtimit.

Nisma po zbatohet nga Bashkia e Tiranës. Krahas pastrimit të sheshit, do të kryhen paralelisht edhe ndërhyrje për infrastrukturën përreth pallateve tashmë të ngritura. Qëllimi është krijimi i një hapësire më të rregullt dhe më funksionale për banorët e zonës.

Në terren ishte edhe ministri i Punëve të Brendshme, Ervin Demo. Ai takoi familjet dhe ndoqi nga afër ecurinë e punimeve. Ministri kërkoi koordinim të plotë mes institucioneve dhe përshpejtim të ritmit të punës.

“Rindërtimi duhet të ecë me ritëm. Familjet kanë pritur mjaftueshëm. Tani duhet punë, çdo ditë, deri te çelësi i shtëpisë së re”, theksoi Demo.

Ndërhyrjet në Kombinat synojnë zhbllokimin e procesit të rindërtimit, i cili ka shënuar vonesa, si dhe përmirësimin e kushteve të jetesës për familjet e prekura nga tërmeti i vitit 2019.