Emocionuese/ Kristjan Asllani nuk po e lëshonte, historia e djaloshit të vogël që e gjeti forcën te Kombëtarja

Fëmija që Kristjan Asllani mbante fort në krahë quhet Joni. Historia e tij është ndryshe nga ajo e moshatarëve.

Sipas familjarëve, Zoti e sprovoi më fort pikërisht sepse e donte shumë. Ndërsa bashkëmoshatarët e tij mendonin se cilin iPhone të merrnin apo cilin PlayStation të blinin, Joni mori rrugën e spitalit. Atje nisi kimioterapinë pasi u diagnostikua me kancer dhe më pas iu nënshtrua edhe një ndërhyrjeje të vështirë kirurgjikale.

Në ato ditë të rënda, atij i duhej vetëm pak forcë për të vazhduar. E gjeti te Kombëtarja. Më saktë, te Kristjan Asllani dhe te shokët e tij kuqezi.

Një familjare e vogëlushit i dërgoi një mesazh Federatës Shqiptare të Futbollit me një lutje të thjeshtë: një video-mesazh nga mesfushori i Kombëtares. Kërkesa mbërriti në destinacion. Për fat të mirë, periudha më e vështirë duket se është lënë pas.

Një vit më vonë, FSHF shkoi përtej asaj videoje. Institucioni e surprizoi Jonin me një ftesë speciale në stadiumin Air Albania. Ai zbriti në fushë krah lojtarëve dhe qëndroi pranë njeriut që i dha kurajë në çastet më të errëta, Kristjan Asllanit.

Pavarësisht moshës së vogël, Joni ka kaluar sprova që shumë të rritur nuk i përjetojnë kurrë. Ndoshta kështu ishte shkruar. Ëndrra e tij u bë realitet.

Ai takoi nga afër të gjithë futbollistët e Kombëtares dhe vizitoi hotelin ku grumbullohet ekipi. Edhe në atmosferën festive të Air Albania-s, kur Joni po shijonte çdo moment, Asllani nuk e lëshoi nga krahu.