“E rrezikshme dhe antikombëtare”- Avokati: Padia e magjistratëve në SPAK krijon destabilitet! Gjyqësori po bëhet palë me opozitën, plane për…

Avokati Idajet Beqiri ka cilësuar si aventureske dhe me rrezik të lartë padinë që disa magjistratë kanë ngritur ndaj ministrit të Financave. Padia lidhet me ngërçin mbi pagat e tyre.

Në një intervistë për emisionin “Tirana Live” në “ABC News”, më 10 shtator, Beqiri theksoi se rruga e duhur është respektimi i vendimit të Gjykatës Kushtetuese. Sipas tij, përfundimisht është Kuvendi i Shqipërisë ai që duhet të vendosë me ligj mbi nivelin e pagesave për gjyqtarët.

Për juristin, kjo situatë rrezikon stabilitetin e vendit dhe dëshmon një përfshirje të pushtetit gjyqësor në konfliktin politik. “Ky është një ngërç institucional që nxjerr në pah mungesën e koordinimit dhe bashkëpunimit midis institucioneve”, shprehet Beqiri. Ai sqaron se padia vjen pikërisht pasi nuk u arrit një marrëveshje me ekzekutivin për indeksimin e pagave. “Çështja u dërgua në Gjykatën e Lartë dhe më pas erdhi vendimi i Gjykatës Kushtetuese. Ky vendim, sipas procedurës, duhet të shkojë për ekzekutim në parlament, sepse buxheti i shtetit hidhet me ligj të veçantë.”

Beqiri paralajmëron se veprimi i magjistratëve ka pasoja të rënda. “Pushteti gjyqësor nuk duhet të ndërmarrë veprime aventureske. Kjo nuk shkon me logjikën juridike, por me atë antishet. Është jashtëzakonisht e rrezikshme kur këtë e bën vetë drejtësia”, thekson ai. Sipas tij, duhej pritur miratimi i ligjit të ri.

Më tej, avokati shkon në një analizë më të thelluar politike. “Kjo padi duket si përpjekje për të krijuar tollovi. Pushteti gjyqësor, në këtë rast, po bëhet palë me opozitën dhe protestën. Kjo është e rrezikshme, antikombëtare dhe anti-shqiptare”, u shpreh Beqiri.

Sipas tij, situata është e panevojshme pasi çështja e pagave pritet të zgjidhet ligjërisht në 17 shtator. “Pse duhet kjo padi kur ligji do të miratohet brenda pak ditëve? Është vetëm për të nxitur destabilitet. Ata që e nisën padinë janë celula të opozitës së mbrapshtë. Kjo lojë i intereson vetëm Greqisë dhe Serbisë”, deklaroi ai. Duke përsëritur se zgjidhja e vetme e pranueshme është akti normativ që do të nxjerrë Kuvendi, ai shtoi: “Çfarë po ndodh tani është kundër interesave kombëtare”.