“E godita vetëm një herë me shpullë”- U la në arrest shtëpiak, zbardhet dëshmia e Jozefin Markut në Gjykatë: Ishte moment gjaknxehtësie

Gjykata ka vendosur arrest shtëpie për këngëtarin Jozefin Markun dhe shoferin e tij, Kristjan Nikolli, pas një seance dëgjimore me dyer të mbyllura sot (9 shtator). Masë e njëjtë u caktua edhe për personin e afërt të tij.

Ata akuzohen për sulmin ndaj Eduard Kuçit, ish-participant në emisionin “Për’puthen”. Hetimet dhe dëshmitë e dala nga salla e gjyqit sjellin versionin e akuzuarve.

Marku mbrohet me argumentin e gjaknxehtësisë së çastit. Ai rrëfeu se e njohu viktimën fillimisht përmes rrjeteve sociale, ku pretendon se u ofendua familjarisht. “Kërkoj ndjesë për veprimin. E kam kryer në gjaknxehtësi e sipër. Nuk e njihja më parë Eduard Kuçin. E kam njohur në rrjetet sociale, ku më ka sharë familjen. E kam goditur vetëm një herë me shpullë, duke i thënë të më kërkojë falje që më ka sharë familjen”, ka deklaruar ai.

Nga ana tjetër, shoferi Kristjan Nikolli ka mohuar të jetë ndodhur në vendin e ngjarjes. Sipas tij, atë natë ndodhej në një dasmë dhe nuk kishte dijeni për incidentin. “Unë atë natë që ka ndodhur ngjarja kam qenë në një dasmë, nuk kam qenë prezent në vendngjarje. Unë Jozin e kam mik, këtë e dinë të gjithë”, është shprehur ai. Lidhur me municionin e gjetur në banesën e tij, Nikolli u përgjigj se “Fishekët që keni gjetur në shtëpinë time ishin të ndryshkur, nuk e di përse ishin aty”.

Të pandehurit do të qëndrojnë në arrest shtëpie deri në vendimin përfundimtar të gjykatës për këtë çështje penale.