Dy aeroplanë për pak sa nuk u përplasën në ajër pas ngritjes nga aeroporti i Los Angelesit

Autoritetet amerikane kanë nisur një hetim pasi dy avionë për pak sa nuk u përplasën në ajër, pak pas ngritjes nga Aeroporti Ndërkombëtar i Los Angelesit (LAX), gjatë fundjavës.

Incidenti ndodhi të shtunën, rreth orës 00:20, kur, sipas Administratës Federale të Aviacionit (FAA), fluturimi 28 i Air France bëri një “kthesë të paautorizuar” pas ngritjes nga aeroporti.

Si pasojë, avioni hyri në trajektoren e një tjetër mjeti fluturues, i cili ishte nisur nga një pistë paralele, transmeton ABC24.AL.

Sipas regjistrimeve audio të komunikimit mes kontrollorëve të trafikut ajror dhe pilotëve, kontrollorët reaguan menjëherë duke i kërkuar avionit të Air France të kthehej djathtas dhe të rikthehej në trajektoren fillestare.

Në të njëjtën kohë, pilotëve të fluturimit 1660 të American Airlines, i cili po udhëtonte drejt Dallasit, iu kërkua të ulnin lartësinë për të shmangur një përplasje të mundshme.

Pas incidentit, kontrollorët e trafikut ajror i pyetën vazhdimisht pilotët e Air France se çfarë kishte ndodhur dhe pse ishin larguar nga trajektorja e caktuar e ngritjes. Megjithatë, për gati 20 minuta nuk duket se morën një përgjigje të qartë.

“Më duhet një përgjigje. Cila ishte trajektorja e ngritjes që ju udhëzoi të ndiqnit kulla e kontrollit?”, dëgjohet duke pyetur një kontrollor ajror pilotin e Air France.

Autoritetet e kanë klasifikuar rastin si një “devijim të mundshëm nga udhëzimet e pilotit”, ndërsa hetimet pritet të sqarojnë rrethanat e plota të incidentit. /ABC24.AL/

Shortly after taking off from LAX, an Air France jet made an unauthorized turn into the flight path of an American Airlines jet headed to Dallas. Some flight-tracking sites say the planes came within 400 feet vertically and 4,600 feet laterally of each other. https://t.co/gBRQbcuoDe— ABC7 Eyewitness News (@ABC7) November 10, 2026