Dhunuan Eduard Kuçin, Gjykata liron me “arrest shtëpie” këngëtarin Jozefin Marku dhe shoferin e tij Kristjan Nikolli!

Gjykata e Tiranës ka lëvizur sot nga paraburgimi në “arrest shtëpi” dy të arrestuarit lidhur me sulmin ndaj ish-banorit të "Big Brother VIP Kosova", Eduard Kuçi. Këngëtari Jozefin Marku dhe shoferi i tij, Kristjan Nikolli, u arrestuan disa ditë më parë për këtë ngjarje.

Incidenti ndodhi në afërsi të mbikalimit të Rinasit, në kryeqytet. Prokuroria kishte kërkuar fillimisht masën e sigurisë “arrest me burg” për ta. Megjithatë, gjyqtari ka vendosur ndryshe në seancën e sotme.

Hetimet për rastin vijojnë ende. Autoritetet po verifikojnë edhe pretendimin për përdorimin e simboleve të Policisë së Shtetit gjatë konfliktit. Një akt-ekspertim i posaçëm është kërkuar për të sqaruar shkallën e dëmtimeve trupore të pësuara nga Eduard Kuçi.

Vetë Kuçi është shpallur në kërkim nga organet e rendit. Ai akuzohet për moskallëzim krimi, pasi fillimisht nuk e ka denoncuar sulmin në polici. Kur është pyetur, ai e ka përshkruar ngjarjen si një konflikt të thjeshtë të shkaktuar nga bllokimi i rrugës me automjet.