DETAJET/ Shpërthimi në pikën e karburantit, të plagosur 3 punonjësit e pikës! Zbulohet shkaku, ja çfarë thotë Policia (FOTO)

Në zonën e "Brrylit" në Tiranë, një shpërthim i fuqishëm në një pikë karburanti la të plagosur tre punonjës të saj këtë mëngjes. Ngjarja shkaktoi dëme të konsiderueshme materiale. Shpërthimi dyshohet se ndodhi gjatë furnizimit me gaz të një automjeti, kur ka plasur një bombol.

Fatmirësisht, askush nuk humbi jetën. Tre të plagosurit u transportuan menjëherë në spital për ndihmë mjekësore. Sipas policisë, ata janë jashtë rrezikut për jetën.

Një strukturë njëkatëshe, që përdorej si stacion karburanti dhe si vendbanim për punonjësit, u dëmtua rëndë nga vala e shpërthimit. Ajo është pjesërisht shembur. Në momentin e incidentit, aty ndodhej edhe një automjet që po furnizohej.

Menjëherë pas ngjarjes, zjarrfikësit arritën të shuanin flakët. Rruga mbetet e bllokuar për qarkullimin. Aktualisht po punohet për pastrimin e rrugës dhe largimin e inerteve. Një fadromë është angazhuar për heqjen e dëmtimeve të strukturës së shkatërruar. Hapja e rrugës do të bëhet vetëm pasi të sigurohet plotësisht zona.

Grupi hetimi dhe forcat e emergjencës vijojnë punën në vendin e ngjarjes. Ende nuk dihet me saktësi shkaku i shpërthimit. Policia e Tiranës njoftoi se po hetohen rrethanat e plota të këtij incidenti. Në një deklaratë paraprake, blutë sqaruan: “Tek ‘Brryli’, në një karburant, dyshohet se ka shpërthyer një bombul gazi, gjatë kohës që po furnizohej me karburant një automjet. Si pasojë, janë dëmtuar 3 persona, punonjës të karburantit, të cilët janë dërguar në spital për mjekim, jashtë rrezikut për jetën. Grupi hetimor vijon punën për sqarimin e rrethanave të rastit”.