Dështon tentativa e hyrjes së 10 shqiptarëve në Angli, po transportoheshin me një gomone me motorë të fuqishëm!

Ministria e Brendshme e Britanisë së Madhe ka konfirmuar arrestimin e dhjetë personave, pasi një skaf me shtetas shqiptarë mbërriti në Mylor Harbour. Ngjarja u shënua në Cornwall.

Policia e Devon dhe Cornwall mori njoftimin rreth orës 03:00 të së dielës, më 27 shtator. Sipas raportimit, disa individë zbritën nga varka në Mylor Harbour, hipën në një furgon dhe u larguan menjëherë nga zona. Informacioni u bë i ditur nga televizioni ITV, cituar nga TCH.

Efektivët shkuan pa vonesë në vendngjarje. Aty ndaluan dy shtetas shqiptarë të dyshuar për shkelje të legjislacionit të emigracionit.

Në operacion u angazhua edhe Roja Bregdetare britanike. Si masë paraprake, rreth orës 04:00 të mëngjesit u aktivizua edhe ekuipazhi i varkës së shpëtimit të Falmouth-it.

Një zëdhënës i Ministrisë së Brendshme tha se autoritetet reaguan me shpejtësi. Ai e cilësoi ngjarjen si incident të rrallë dhe të izoluar në Mylor Harbour, Falmouth. "Dhjetë persona janë arrestuar që atëherë. Një tjetër person, që besohet të jetë nën moshën 18 vjeç, i është referuar shërbimeve sociale", deklaroi zëdhënësi.

Sipas autoriteteve britanike, hetimi është ende në zhvillim. Për këtë arsye detaje të tjera nuk mund të bëhen publike për momentin.

Ministria e Brendshme theksoi se hyrjet e fshehta të këtij lloji janë të pazakonta. Mjeti i përfshirë ishte një skaf i vogël që transportonte një numër të kufizuar personash. Çështja tashmë është marrë në dorë nga Njësia për Hetimet Kriminale dhe Financiare për Uellsin dhe Jugperëndimin e Britanisë.