Dashamir Shehi: Edhe unë do t’i shkrija disa bashki të vogla, por kjo nuk përbën reformë

Kryetari i Lëvizjes për Zhvillim Kombëtar, Dashamir Shehi, ishte i ftuar në emisionin “Now me Erla Mëhillin” për të folur mbi votimin në Kuvend të ndryshimeve në ndarjen territoriale.

Në studio ai u ndal te ulja e numrit të bashkive nga 60 në 46. Sipas tij, ky hap nuk përbën një reformë të mirëfilltë. Efektet e formulës së re, shtoi Shehi, mbeten për t'u parë.

Edhe ai vetë do të pranonte shkrirjen e disa njësive të vogla. Por, theksoi ai, kaq nuk mjafton për ta cilësuar ndërhyrjen si reformë territoriale.

Në fjalën e tij, Shehi insistoi se thelbi i reformës mungon plotësisht.

“Esencë reforme s’ka fare. Kjo fjalë e madhe, reformë! Ishin 60 dhe u bënë 46. Çfarë rëndësie ka kjo? Kjo është vazhdimi i asaj që u bë 10 vjet më parë. Ishin 370 dhe u bënë 60. Ajo kishte një lloj logjike edhe nga ana numerike, por kjo s’ka fare. Qenkan 60 apo qenkan 46? Reforma ka filozofi tjetër. Që të quhet reformë, nuk është për të bashkuar territore apo për të ndarë territore. Reforma ka frymë tjetër, bashkon komunitete, jo territore. Kjo është filozofia e reformës. Disa prej atyre bashkive të vogla do t’i shkrija edhe unë, disa ato në jug, dy fshatra këtu, dy atje, do t’i bashkoja edhe unë. Por reformë është kur ti t’i ofrosh shërbim qytetarit, të ndryshosh filozofinë e ndarjes. Unë kam qenë 15 vjet përpara dhe jam prapë që Shqipëria ka nevojë për këtë punë, që zona urbane të ndahet nga zona rurale, atje ku është e mundur, që të çlirohen nga barra e njëra-tjetrës, që njerëzve t’u ofrohet një administratë e specializuar që s’e kanë sot. Njerëzit të kenë përfaqësim politik që s’e kanë sot. Për shembull, ka ndonjë nga fshatrat e Tiranës përfaqësues politik në bashki? Nuk ka asnjë, se nuk e quajnë fare atë zonë atje. Pastaj është gabim që në fillim, se kur trajtohet niveli i pushtetit të tretë, duhet të trajtohet edhe i dyti. Ne kemi 12 qarqe e prefektura, pse nuk tentojnë të ulin numrin e qarqeve? Një reformë është ajo, një filozofi e përbashkët. Madje, ajo duhet të vinte me gjithë faturën, jo thjesht financiare, por edhe me kompetencat”, tha Shehi.

Ai këmbënguli se Shqipëria ka nevojë prej kohësh për një ndarje tjetër. Ideja e tij, e artikuluar prej 15 vitesh, është ndarja e zonës urbane nga ajo rurale aty ku lejon terreni. Kështu, sipas tij, secila palë çlirohet nga ngarkesa e tjetrës.

Një administratë më e specializuar dhe një përfaqësim politik real për banorët mungojnë sot. Shehi solli si shembull fshatrat e Tiranës. Asnjë prej tyre, tha ai, nuk ka zë në bashki.

Për kreun e LZHK-së, trajtimi është bërë gabim që në nisje. Kur rishikohet niveli i tretë i pushtetit, duhet prekur edhe i dyti. Shqipëria ka 12 qarqe dhe prefektura. Pse nuk u prek numri i tyre, pyeti ai.

Në fund, ai nënvizoi se një reformë e tillë kërkon vizion të plotë. Duhet të vijë me kosto të qartë dhe me kompetenca të reja. Jo vetëm me llogari financiare.