“Çfarë trafiku armësh? A jeni në terezi?”, Nufi mohon akuzat pas audios së publikuar nga Ahmetaj

Ministri i Mbrojtjes, Ermal Nufi, ka mohuar përfshirjen në çdo aktivitet të trafikimit të armëve pas publikimit të një audio-përgjimi nga ish-zëvendëskryeministri Arben Ahmetaj. Në debatin e ngritur nga ky i fundit, sipas të cilit përmenden biseda për marrëveshje biznesi në fushën e armëve, ministri iu përgjigj shkurt gazetarëve.

Ngjarja ka ndodhur gjatë hyrjes së Nufit në mbledhjen që kryeministri Edi Rama zhvilloi me anëtarët e qeverisë dhe drejtuesit politikë të Partisë Socialiste në "Vilën e Kuqe" në Sauk. I pyetur direkt nga gazetarët rreth pretendimeve të Ahmetajt, ministri reagoi me mohim. "Çfarë trafiku armësh? A jeni në terezi? Nuk ka…", tha ai.

Më pas, kur u kërkua një koment më i zgjerur lidhur me audio-përgjimin e publikuar në Syri TV, Nufi refuzoi të shprehej. "Përgjimet e dynjasë do dëgjoj unë?", tha ai, duke shmangur një përgjigje të qartë. Së fundi, një gazetare i kërkoi një shpjegim publik mbi akuzat, por përgjigja e ministrit ishte e shkurtër: "Asgjë".

Burimi i akuzave është audio-përgjimi i publikuar nga Ahmetaj. Në të shfaqet biznesmeni shqiptaro-izraelit Ron Yef/, i cili diskuton për mundësi bashkëpunimi. Nga kjo audio nxirret se tema e bisedës ka qenë prodhimi dhe tregtimi i armëve, ndërsa Nufi përmendet në kontekst të këtyre diskutimeve. Ministri i Mbrojtjes ka zgjedhur të mos hyjë në detaje, duke e mbyllur çdo mundësi sqarimi me dy fjalët "Asgjë".