“Call Centerat shqiptare po na mashtrojnë”, ministri grek lëshon alarmin: Do arrestohen të gjithë!

Sipas autoriteteve greke, mashtrimet telefonike janë shndërruar në një plaɡë reale. Grupet e organi­zuara ngrejnë qendra thirrjesh për të gënjyer kryesisht të moshuarit, duke i zgjeruar veprimtaritë edhe jashtë kufijve të Greqisë.

Ministri i Mbrojtjes së Qytetarëve, Michalis Chrysochoidis, e denoncoi këtë fenomen irritues. Ai njoftoi se po krijohet një strukturë operative e përhershme për t’i dhënë fund këtij problemi.

“Mashtrimet telefonike janë një epidemi në vendin tonë. Mashtruesit janë kryesisht romë,” deklaroi Chrysochoidis për televizionin Mega. Ai shtoi se këta persona “janë kthyer drejt kriminalitetit dhe po kthehen ngadalë drejt këtij krimi, i cili është i tmerrshëm. Në kuptimin që ata shumë lehtë ua marrin pronën njerëzve. Dhe kjo është tragjike, është dramatike.”

Një takim i posaçëm është planifikuar për të diskutuar krijimin e strukturave të forta. “Sepse nuk është vetëm grek, është pan-evropian,” u shpreh ministri. “Ka pasur hetime dhe arrestime të mëdha, shumë prej tyre janë në burg. Por në të njëjtën kohë, ato po shumëfishohen nga prapa.”

Sipas tij, dimensioni ndërkombëtar i fenomenit është shqetësues. Grupet nuk janë të kufizuara vetëm në Greqi, por krijojnë rrjete aktive në shtete të tjera. “Ka një qendër thirrjesh në Shqipëri, për shembull, ka një qendër thirrjesh në Shkup, në Sofje,” theksoi Chrysochoidis. Ai i përshkroi këto si “grupe specifike transnacionale” që bashkëpunojnë për mashtrim.

Veprimtaritë e tyre nuk kufizohen vetëm në thirrjet telefonike. Sipas ministrit, ka edhe mashtrime elektronike që përfshijnë shuma shumë më të mëdha parash.

Chrysochoidis iu referua operacioneve të mëdha që kanë kryer FBI-ja greke dhe Siguria e Atikës. Ai theksoi se tani kërkohet një përgjigje më e përhershme dhe e organizuar.

Ministri u shfaq kategorik për rezultatin e betejës. “Jini të sigurt për këtë: Ne do t’i arrestojmë të gjithë, na duhet vetëm një strukturë e përhershme dhe një politikë operative e përhershme për t’i dhënë fund kësaj gjëje,” përfundoi ai.