Burgjet nën “përgjim”, 148 punonjës dhe 196 të izoluar të proceduar, kontrolle edhe ndaj familjarëve!

Struktura e re nën ombrellën e Drejtorisë së Përgjithshme të Burgjeve ka forcuar ndjeshëm mekanizmat e kontrollit brenda institucioneve të vuajtjes së dënimit. Objekt i verifikimeve të imta janë bërë qelitë, të paraburgosurit, stafi i burgjeve dhe madje edhe të afërmit që vizitojnë të dënuarit.

Gazetarja Anila Hoxha ka siguruar të dhëna zyrtare nga Agjencia e Mbikëqyrjes së Sistemit të Ekzekutimit të Vendimeve Penale. Ajo bën me dije se kontrollet intensive janë ushtruar gjatë periudhës janar-gusht të këtij viti.

Gjatë kësaj periudhe tetëmujore, në total janë iniciuar 287 procedura penale. Ndërkaq, 232 raste të tjera janë referuar në Prokurori për hetim të mëtejshëm.

Pjesa më e madhe e procedimeve, 196 raste, janë ndaj të dënuarve vetë, si rezultat i kontrolleve brenda ambienteve të burgjeve. Mirëpo, vëmendja e kontrolleve nuk është ndalur aty. 148 punonjës të sistemit janë gjithashtu nën hetim. Po ashtu, në procedim penal kanë përfunduar edhe 16 familjarë të personave të dënuar.

Të dhënat dëshmojnë se netoja e kontrollit shtrihet në të gjitha hallkat, nga qelitë deri te pikat hyrëse dhe kontaktet me jashtë.

Nga 287 personat e proceduar penalisht, shumica dërrmuese prej 264 individësh, që përfaqësojnë 92% të totalit, janë ende në liri. Për 23 persona të tjerë, ose 8% të rasteve, është vendosur masa e sigurisë së arrestit ose ndalimit me izolim.