Berisha takon një kongresmen, PD: I tregoi për korrupsionin dhe trafikun e drogës nga Shqipëria

Gjatë qëndrimit në Shtetet e Bashkuara, kreu i PD-së, Sali Berisha, u takua me kongresmenin Keith Self. Në këtë takim e shoqëronte edhe Fatmir Mediu, i Partisë Republikane.

Sipas një njoftimi nga Partia Demokratike, temat kryesore të bisedës ishin trafiku i drogës, korrupsioni dhe ndikimi i elementëve të krimit të organizuar mbi proceset zgjedhore në Shqipëri.

Berisha akuzoi direkt qeverinë e Edi Ramës. Ai pretendoi se ajo përdor të ardhura të paligjshme nga droga dhe struktura kriminale për të ndikuar në zgjedhje dhe për të forcuar pushtetin. Më tej, lideri demokratë shtoi se kryeministri ka shkatërruar institucionet e pavarura dhe ka grumbulluar të gjithë pushtetin në duart e tij.

"Në takim u diskutua edhe ideja e një qeverie teknike si mekanizëm për garantimin e zgjedhjeve të lira dhe të ndershme, duke marrë si referencë modelin e Maqedonisë së Veriut. Sipas Berishës, një zgjidhje e tillë do të krijonte kushtet për një proces zgjedhor ku pushteti përcaktohet përmes votës së lirë. Kongresmeni Self, nga ana e tij, shprehu interes për zhvillimet në Shqipëri dhe situatën në Ballkan, duke deklaruar se do ta ndjekë me vëmendje rajonin", thuhet në njoftim.

Self, nga ana e tij, shfaqi interes për situatën në Shqipëri dhe Ballkan. Ai premtoi se do të vijojë të ndjekë nga afër zhvillimet në rajon.