Berat/ Grabitje spektakolare! Hajdutët përlajnë 200 milionë lekë në kasafortat e biznesmenëve

Policia e Beratit po heton dy vjedhje të rënda të ndodhura brenda pak ditësh, ku hajdutët arritën të marrin kasafortat me vlera të konsiderueshme. Vlera totale e grabitur kap shumën prej 200 milionë lekëve të reja.

Ngjarja e parë u regjistrua në ambientet e biznesit “Veza e Mëngjesit”, ndodhur përgjatë rrugës nacionale Berat-Dimal. Pronari i këtij lokalit, Leonard Fani, është viktima e parë e kësaj serie grabitjesh. Autorët hyrën gjatë natës dhe morën kasafortën e tij.

Pak ditë më vonë, u godit edhe banesa e biznesmenit tjetër, Lumnir Osoja. Ai është pronar i kompanisë “Center Albania”. Edhe këtë herë, grabitësit vepruan në errësirë, duke arritur të nxjerrin kasafortën nga shtëpia.

Burimet policore bëjnë me dije se në çdo kasafortë dyshohet se gjendej rreth 100 milionë lekë. Kjo shumë e madhe brenda pak ditësh ka ngritur dyshime për një grup të organizuar kriminal.

Hetuesit besojnë se pas këtyre veprimeve qëndron një bandë me disa persona. Mes tyre mund të ketë bashkëpunim. Grabitjet u kryen me profesionalizëm, gjithmonë në orët e vona të natës kur zona ishte e qetë.

Për të mbuluar gjurmët dhe identitetin e tyre, autorët dyshohet se kanë përdorur maska dhe kapuça. Mënyra e tyre e veprimit dhe zgjedhja e objektivave po studiohet me vëmëndje nga grupi hetimor.

Forcat e rendit vijojnë intensive punën për zbardhjen e këtyre ngjarjeve të rënda. Po kryhen ekspertizat e vendit të krimit dhe po mblidhen prova të tjera që mund të çojnë në identifikimin e autorëve. Çdo detaj i veprimit të hajdutëve po analizohet.