BE sfidon Shqipërinë dhe i lë ‘detyra shtëpie’, Kuvendi duhet të miratojë 41 nisma ligjore deri në fund dhjetorit!

Shteti shqiptar po nxiton përgatitjen e ligjeve të reja për t'i përmbushur detyrimet evropiane, me synimin që të bashkohet me Bashkimin Evropian deri në vitin 2030. Miratimi i 41 iniciativave ligjore deri në fund të dhjetorit paraqet një nga kërkesat kryesore. Për këtë qëllim, mazhoranca iu drejtua opozitës për bashkëpunim që në seancën e parë parlamentare të këtij sesioni.

Një ndër draftligjet më të debatuara është ai për Bankën e Shqipërisë. Propozimi parashikon dhënien e imunitetit Guvernatorit dhe zëvendësve të tij. Paralelisht, qeveria po harton një dokument të ri për reformimin e prokurimeve publike. Aty sugjerohet përdorimi i inteligjencës artificiale për menaxhimin e tyre.

Zgjerimi i përdorimit të inteligjencës artificiale është në plan edhe për fusha të tjera. Qeveria po përgatit një ligj të vecantë për rregullimin e kësaj teknologjie. Së bashku me këtë, do të reformohen edhe sektorët e digjitalizimit dhe komunikimeve elektronike.

Ministria e Financave ka ngarkesë me shtatë nisma ligjore që lidhen me kapitullin e Tatimeve. Gjithashtu, po përgatitet edhe një draftligj për tregtimin e kriptoaseteve. Ndërsa për peshkimin, një sektor ku standardet evropiane janë të vështira, qeveria po përgatit ndryshimet ligjore për harmonizim.

Një tjetër detyrim i rëndësishëm ka të bëjë me ligjin për financimin e partive politike. Miratimi i tij nuk mund të shtyhet më tej, pasi duhet të përfshijë opinionet e Komisionit të Venecias dhe ODIHR-it. Krahas kësaj, duhet miratuar edhe një kuadër i ri ligjor për donacionet dhe sponsorizimet.

Praktika europiane nënvizon rëndësinë e miratimit të këtyre ligjeve me konsensus. Megjithatë, ambienti politik në vend vazhdon të jetë polarizuar. Nisja e sesionit të ri parlamentar nuk ka sjellë ndonjë përmirësim të dukshëm të situatës.