Bashkëpiloti i Flydubai planifikoi sulm vetëvrasës në aeroportin e Tel Avivit, i frymëzuar nga 11 Shtatori

Hetimi për sulmin brenda avionit të Flydubai ka nxjerrë në pah një plan për akt terrorist në Tel Aviv. Prokurori i lartë i Emirateve të Bashkuara Arabe bëri me dije se bashkëpiloti nga Omani, i cili më 30 shtator sulmoi kapitenin gjatë fluturimit, kishte si objektiv përplasjen e aeroplanit në aeroportin ndërkombëtar të qytetit izraelit. Qëllimi ishte shkaktimi i një numri sa më të madh viktimash. Njoftimi u bazua në konkluzionet e hetimit, të publikuara nga mediat shtetërore.

Sipas prokurorisë, autori u frymëzua nga sulmet e Al-Kaedës në Shtetet e Bashkuara më 11 shtator 2001. Ai synonte, siç thuhet në dosje, të shkaktonte “humbjen më të madhe të mundshme të jetëve”.

Dokumenti i hetimit evidenton se bashkëpiloti i plotësonte kriteret për punësim. Ai dispononte licencë piloti, kishte dorëzuar dëshmi për sjellje të mirë dhe kishte kaluar të gjitha verifikimet e detyrueshme profesionale dhe të sigurisë.

Pavarësisht kësaj, raportimet tregojnë një tjetër detaj. Në Oman, atij i ishte ndaluar më parë të fluturonte për shkak të qëndrimeve ekstremiste. Këtë e transmetoi ABC24.AL.

Në bord shpërtheu paniku. Pasagjerët dëshmuan se avioni humbi papritur rreth 5.000 metra lartësi. Disa prej tyre arritën të hynin në kabinën e pilotimit. Aty u përpoqën të ndihmonin për të rimarrë kontrollin e mjetit fluturues.

Kapiteni, me kombësi indiane, u godit me sëpatë nga bashkëpiloti dhe mbeti i plagosur. Ai mundi megjithatë të hapë derën e kabinës. Ndërhyrja u dha mundësi udhëtarëve dhe ekuipazhit ta neutralizonin agresorin. Më pas avioni kreu një ulje të detyruar në Arabinë Saudite.

Në fluturim udhëtonin kryesisht shtetas izraelitë.

Të enjten u mbajt një ceremoni vlerësimi në Izrael. Presidenti Isaac Herzog nderoi me Çmimin Presidencial për Heroizëm Civil gjashtë shtetas izraelitë që penguan tentativën për rrëmbimin e avionit.

“Guximi dhe zgjuarsia e treguar nga qytetarët që ndodhen këtu nuk mund ta zbehin detyrimin për të marrë përgjigje të plota. Të gjithë ne meritojmë përgjigje të qarta dhe bindëse”, u shpreh Herzog, cituar nga The Jerusalem Post.

Reagoi edhe kryeministri Benjamin Netanyahu. Ai vlerësoi guximin e pasagjerëve dhe të kapitenit që bënë të mundur ndalimin e sulmit. Po ashtu, ai urdhëroi rishikimin e plotë të çdo hallke sigurie që lidhet me fluturimet e aviacionit civil të huaj drejt Izraelit. /ABC24.AL/