Avokatët bojkotojnë edhe masat e sigurisë, Rregullorja censuruese përçan gjyqtarët e GJKKO! Njëra palë kundër kryetarit Erion Bani: Duhet dialog!

Avokatët kanë vendosur ta shtrijnë bojkotin edhe te masat e sigurisë në Gjykatën e Posaçme. Vendimi vjen pasi ata kishin pezulluar tashmë pjesëmarrjen në seancat gjyqësore.

Nisma për masat e sigurimit nisi zyrtarisht të hënën. Megjithatë, në GJKKO nuk ishte parashikuar asnjë seancë për caktimin e masës së sigurimit personal atë ditë.

E hëna shënonte edhe afatin e fundit që Dhoma e Avokatisë i kishte dhënë Gjykatës së Posaçme dhe Këshillit të Lartë Gjyqësor. Avokatët kërkonin tërheqjen e rregullores së re, e cila sipas tyre censuron punën e tyre dhe të gazetarëve duke ndaluar mbajtjen e celularëve në sallë.

Përballë kësaj situate, kryetari i Gjykatës, Erjon Bani, thirri një mbledhje me trupën gjyqësore të GJKKO-së. Deri tani ai nuk kishte bërë asnjë hap pas. Sipas informacioneve të Report Tv, gjyqtarët u ndanë në dy kampe gjatë diskutimit. Një grup doli kundër qëndrimit të Banit dhe kërkoi hapjen e dialogut me avokatët për të zgjidhur ngërçin.

Kujtojmë se bojkoti i seancave nisi pas vendimit unanim të Këshillit të Përgjithshëm të Dhomës së Avokatisë, sapo GJKKO filloi zbatimin e rregullores së re. Ky qëndrim ka çuar në shtyrjen e disa proceseve të rëndësishme.

Krahu tjetër i gjyqtarëve kërkoi masa më të ashpra ndaj avokatëve. Deri më tani, avokatët që nuk janë paraqitur në seanca janë ndëshkuar me gjobë prej 50 mijë lekësh të rinj për çdo mungesë. Mbledhja nuk prodhoi një vendim përfundimtar. Ende nuk dihet si do të veprohet më tej, raporton "Shqiptarja".

Pritet që situata të përkeqësohet me shtrirjen e bojkotit te masat e sigurisë. Efektet mund të jenë të rënda. Të arrestuarit nuk mund të mbahen në paraburgim pa një masë sigurie të caktuar nga gjykata. Ligji parashikon që çdo person i arrestuar duhet të dalë para gjyqtarit brenda 72 orësh për masë. Ndryshe, arrestimi e humbet vlefshmërinë dhe i ndaluari mund të lirohet.