“Ankesa për policë me veshje civile”- Avokati i Popullit bën bilancin e 72 orëve protestë: 214 të shoqëruar! Shqetësim të miturit, po verifikojmë çdo rast

Avokati i Popullit ngre shqetësimin për të miturit pas 72 orëve protestë - 214 të shoqëruar, ankesa për efektivë civilë pa shenja identifikuese

Avokati i Popullit, Endri Shabani, ka paraqitur bilancin paraprak të katër ditëve të fundit të protestave. Në total janë kontaktuar 214 persona të privuar nga liria.

Shqetësimi kryesor, sipas tij, lidhet me trajtimin e të miturve. Po verifikohet çdo rast një e nga një.

Në një deklaratë për mediat, Shabani bëri të ditur se janë depozituar ankesa për dhunë gjatë shoqërimit. Po ashtu është raportuar mungesë e kujdesit mjekësor dhe tejkalim i afateve për caktimin e masës së sigurisë.

Një tjetër problem i denoncuar është prania e punonjësve të policisë me rroba civile, pa elemente identifikuese.

“Gjatë këtyre ditëve kemi marrë ankesa për punonjës policie me veshje civile pa shenja identifikuese. Kjo çështje do të shqyrtohet me prioritet. Pjesa tjetër e ankesave lidhej me ushtrimin e dhunës gjatë shoqërimit, mosofrim të kujdesit mjekësor dhe kalim të afateve për masën e sigurisë”, u shpreh Shabani.

Gjatë kësaj periudhe, grupet e Mekanizmit Kombëtar për Parandalimin e Torturës, pranë Avokatit të Popullit, kanë zhvilluar inspektime pa paralajmërim. Kontrollet u shtrinë në komisariatet nr. 1 deri nr. 6 në Tiranë, si dhe në Vlorë, Korçë dhe Shkodër. Në fokus ishin edhe Blloku i Sigurisë dhe Spitali i Traumës.

Në të gjitha ambientet e verifikuara u konstatua mbipopullim. Kushtet në Bllokun e Sigurisë u vlerësuan si të papranueshme.

Aty u gjetën të ndaluar që flinin dy persona në një krevat. Të tjerë flinin mbi sfungjerë në dysheme. Mungonin batanijet dhe sistemi i ngrohjes nuk funksiononte. Uji i pijshëm sigurohej nga familjarët e të ndaluarve. Kishte mungesë sapuni dhe letre higjienike. Shërbimi mjekësor përballonte vetëm pjesërisht fluksin e kërkesave.

Për 26 persona të mbajtur në Bllokun e Sigurisë, pretendimet për dhunë dhe shenjat e dukshme në trup janë reflektuar në procesverbalet përkatëse të konstatimit. Ndërkohë librat ku regjistrohen të shoqëruarit rezultuan me mangësi. Të dhënat nuk ishin hedhur të plota.

Vëmendje e veçantë i është kushtuar trajtimit të të miturve. Sipas Avokatit të Popullit, disa prej tyre janë marrë në pyetje pa praninë e prindit apo kujdestarit ligjor. Ka munguar edhe psikologu. Kjo praktikë bie ndesh me ligjin dhe standardet ndërkombëtare për mbrojtjen e fëmijëve.

Po verifikohen gjithashtu dëshmi për rreth 12 të mitur. Dyshohet se ata janë mbajtur të izoluar brenda ambienteve të një ministrie. Rasti është ende në hetim.

Në Spitalin e Traumës, gjatë datave 14 dhe 15 tetor, morën shërbim 128 persona. Prej tyre 86 ishin punonjës policie, 38 protestues dhe 5 të mitur. Një pjesë e konsiderueshme u intervistua në mënyrë konfidenciale. U administruan edhe ankesat e tyre. Biseda konfidenciale janë zhvilluar edhe me mjekë dhe psikologë.

Avokati i Popullit shpjegoi edhe mandatin e institucionit. Mekanizmi ka të drejtë ligjore të hyjë pa njoftim në çdo vend ku mbahet një person i privuar nga liria. Bëhet fjalë për komisariate, ambiente shoqërimi, paraburgime dhe institucione shëndetësore. Institucioni shqyrton ankesat për abuzime nga çdo organ publik, përfshirë Policinë e Shtetit.

Ky mandat, theksoi ai, mbron të gjithë. Ai përfshin protestuesit, kalimtarët e rastësishëm, pronarët e bizneseve të dëmtuara, por edhe vetë punonjësit e policisë.

Megjithatë Kushtetuta e kufizon rolin. Ai mbetet vetëm monitorues.

“Por Kushtetuta e ka kufizuar këtë mandat në monitorim, në dokumentimin e së vërtetës dhe në nxjerrjen e rekomandimeve. Kushtetuta nuk na mundëson që ne të marrim masa vetë ndaj punonjësve që abuzojnë me detyrën. Për këtë qëllim, ligji ka parashikuar mekanizma të tjerë, të cilët kanë kompetencat dhe burimet e nevojshme”, deklaroi Shabani.

Ai shtoi se e drejta për tubim paqësor garantohet nga Kushtetuta. Protesta duhet të zhvillohet pa dhunë. Çdo akt dhune u dënua.

“Dënojmë dhunën ndaj policëve. Dënojmë dhunën ndaj protestuesve. Dënojmë dëmtimin e pronës publike dhe të pronës private, përfshirë bizneset”, tha ai.

Shteti ka detyrimin të ruajë rendin. Policia ka të drejtë të përdorë forcë kur është e domosdoshme. Por ajo duhet të jetë proporcionale.

Çdo punonjës që përdor forcë duhet të jetë i identifikueshëm. Shenja dalluese mbron qytetarin nga abuzimi. Ajo mbron edhe policin nga akuzat e pabaza.

Për të miturit, puna ka prioritet absolut. Komisionerët kanë administruar deklarimet e tyre. Ato janë dhënë para psikologes klinike në Spitalin e Traumës.

Në përfundim, Avokati i Popullit i kërkoi Policisë së Shtetit identifikim të plotë të efektivëve në çdo operacion. Ai kërkoi ndarjen e të miturve nga të rriturit në çdo moment.

Ministrisë së Brendshme i kërkoi ndërhyrje të menjëhershme në Bllokun e Sigurisë. Kërkesa përfshin ujë, ushqim, shtretër, ngrohje, higjienë dhe prani të mjekut pa ndërprerje.

Gjetjet mbeten paraprake. Verifikimet do të vijojnë për çdo rast veç e veç.