“7 fëmijët e Ursulës të ulen në tryezë!”- Rama batuta nga Italia: Ja si duhet të funksionojë integrimi gradual dhe zgjerimi i BE! Të dëgjojnë babanë, nënën, tezen…

Kryeministri Edi Rama, gjatë një deklarate për mediat në Itali, u përgjigj me tone batutash ndaj pyetjes së gazetarëve mbi mënyrën e duhur të funksionimit të integrimit në Bashkimin Europian.

Ai përdori metaforën e "7 fëmijëve të Ursulës" për të përshkruar vendet kandidate. Sipas kreut të qeverisë, këto vende duhet të kenë një vend në tryezën e BE-së duke u angazhuar njëkohësisht me plotësimin e kritereve. Në këtë mënyrë, ato do të fitonin të drejtat përkatëse të anëtarësimit për çdo kapitull të mbyllur.

"7 fëmijët e Ursulës duhet të përmbushin çdo kriter, duhet të ndjekin rregullat për çdo kapitull dhe duhet t’i bëjnë ballë të gjithë procesit neurotik të makinerisë prej 35 mijë grash e burrash, që është makineria më burokratike që ka krijuar njerëzimi", u shpreh Rama.

Më tej, kryeministri shpjegoi ndryshimin që duhet të ndodhë në radhën e veprimeve. Ai theksoi se nuk duhet pritur më finalizimi i 33 kapitujve për të marrë vendimin politik. Për këtë arsye, Ukraina dhe gjashtë vendet e tjera kandidate duhet të jenë pjesë e tryezës së diskutimit.

"Ato si fëmijë duhet të dëgjojnë babanë dhe nënën, Francën dhe Gjermaninë, pastaj tezen Itali dhe të tjerët", u shpreh ai, duke sqaruar rolet në kuadër të familjes së madhe evropiane. "Por duhet të jenë rreth asaj tryeze, ndërkohë që përmbushin kriteret."

Rama detajoi edhe mekanizmin e propozuar. Çdo kapitull i mbyllur do t'i jepte një status të plotë anëtarësimi për fushën përkatëse. "Nëse mbyll kapitullin për shkencën, për atë bëhesh anëtar dhe ke të njëjtat të drejta", shtoi ai.

Sipas kryeministrit, ky do të ishte një sistem kontribut-dhënie. "Çdokush që duhet të marrë më shumë nga tryeza, i jep më shumë tryezës, por duhet të jenë të pranishëm", u përfundua deklarata e tij.